AKSHARAM TELUGU WEEKLY

చిరు.. బాలయ్య "లోపాయకారి" ఒప్పందం!

2009-03-12T04:04:00.002-07:00

ఎం ఎచ్ అహెసన్ / హైదరాబాద్

రాష్ట్ర రాజకీయ యవనికపై అధికార కాంగ్రెస్ నేతల్లో గుబులు పుట్టిస్తున్న వెండితెర హీరోలు మెగాస్టార్ చిరంజీవి, యువరత్న బాలకృష్ణల మధ్య లోపాయికారి ఒప్పందం కుదిరినట్టు రాజకీయ భోగట్టా. అసెంబ్లీ ఎన్నికల ఫలితాల అనంతరం రాష్ట్రంలో హంగ్ నెలకొన్నట్టయితే ఈ ఒప్పందం మేరకు అధికారాన్ని పంచుకోవాలని భావిస్తున్నారు.

ఈ మేరకు తలా రెండున్నర సంవత్సరాలు ముఖ్యమంత్రి బాధ్యతలను నిర్వహిస్తూ.. సినీ స్నేహాన్ని రాజకీయ నిజజీతంలోనూ కొనసాగించాలని వారిద్దరు ఓ నిర్ణయానికి వచ్చినట్టు సమాచారం. అదే సమయంలో తెదేపా అధినేత చంద్రబాబుకు "చెక్" పెట్టాలని ఓ ప్రణాళికను రూపొందించారు.

తొమ్మిదేళ్ళ పాటు అధికారంలో కొనసాగిన చంద్రబాబు.. తమ కుటుంబానికి పెద్దగా ఒరగబెట్టిందీ ఏమీలేదని, తన అన్న హరికృష్ణకు మంత్రిపదవి ఇచ్చినట్టే ఇచ్చి తిరిగి లాగేసుకున్నారనే అక్కసు బాలకృష్ణలో నెలకొందట. ప్రధానంగా, తన తండ్రి ఎన్టీఆర్‌కు వెన్నుపోటు పొడిచిన విషయాన్ని యువరత్న ఏమాత్రం మరిచి పోలేదని ఆయన సన్నిహిత వర్గాల సమాచారం.

ప్రస్తుతం సాగిస్తున్న ఎన్నికల ప్రచారంలో గత్యంతరం లేక, పార్టీకి తిరిగి పూర్వవైభవం సమకూర్చేందుకు బావ చంద్రబాబుకు అనుకూలంగా ప్రకటనలు చేస్తూ పార్టీ శ్రేణులను ఉత్తేజపరుస్తున్నానని బాలకృష్ణ తన మనస్సులోని మాటను వెల్లడించారట.

అలాగే, చిరంజీవి కూడా తన మదిలోని ఆవేదనను వెండితెర స్నేహితునితో పంచుకున్నట్టు వినికిడి. అంతేకాకుండా, ఎన్నికల ప్రచారంలో తామిద్దరం ఒకరిపై ఒకరు వ్యక్తిగత విమర్శలు కూడా చేసుకోరాదనే ముందస్తు ఒప్పందం కుదుర్చుకున్నారనే ఆరోపణలు సైతం వస్తున్నాయి.

ప్రధానంగా, అధికార పంపిణీపైనే వీరిద్దరి మధ్య రహస్య చర్చలు సాగినట్టు సమాచారం. ఎవరికి ఎక్కువ సీట్లు వస్తే వారు తొలుత ముఖ్యమంత్రి పదవిని అధిరోహించాలని, రెండో టర్మ్‌లో రెండో వ్యక్తి బాధ్యతలు నిర్వహించేలా అంగీకారానికి వచ్చారట. ఏది.. ఏమైనా, చిరంజీవి రాజకీయ ప్రవేశంతో రాష్ట్రంలో హంగ్ తథ్యమని, ఆ సమయంలో మెగాస్టార్ కీలక పాత్ర పోషిస్తారని రాజకీయ విశ్లేషకుల అభిప్రాయంగా వుంది.

పెద్దపల్లి బరిలో చిరంజీవి వర్సెస్ రాములమ్మ!

2009-03-12T04:04:00.001-07:00

ప్రజారాజ్యం పార్టీ అధినేత చిరంజీవి తెలంగాణాలో పోటీ చేసే రెండో స్థానం కూడా ఖరారైంది. అటు ఎన్టీపీతో సహా, ప్రజారాజ్యం పార్టీకి మంచి పట్టున్న పెద్దపల్లి అసెంబ్లీ నియోజకవర్గం నుంచి పోటీ చేయాలని మెగాస్టార్ నిర్ణయించినట్టు ఆ పార్టీ వర్గాలు సూచన ప్రాయంగా వెల్లడించాయి. దీంతో ఆయనపై పోటీకి మహా కూటమి నుంచి తెలంగాణా రాష్ట్ర సమితి జనరల్ సెక్రటరీ విజయశాంతిని దించాలని తెరాస నిర్ణయించింది.

బీసీ ఓటర్లు ఎక్కువగా ఉన్న ఈ నియోజకవర్గంలో మహాకూటమి తరపున మున్నురుకాపు అభ్యర్థిని బరిలోకి దించాలని భావించారు. అయితే, ముల్లును ముల్లుతోనే తీయాలన్న చందంగా సినీ గ్లామర్‌ను సినీ గ్లామర్‌తోనే ఎదుర్కోవాలనే తుది నిర్ణయానికి మహాకూటమి నేతలు వచ్చినట్టు వినికిడి. నిజానికి విజయశాంతిని భువనగిరి నుంచి బరిలోకి దించాలని భావించారు.

అయితే, పెద్దపల్లి బరిలో చిరంజీవి పోటీ చేయడం ఖాయమని తెలియడంతో విజయశాంతిని బరిలోకి దింపాలని మహాకూటమి భావించినట్టు సమాచారం. అయితే మహాకూటమిలోని నాలుగు పార్టీల మధ్య ఏకాభిప్రాయంపై ఆధారపడి ఉంటుంది.

ఏ రాజుకి ఓటరన్న కిరీట ధారణం చేస్తాడో..?!!

2009-03-12T04:01:00.000-07:00

ఎం ఎచ్ అహెసన్ / హైదరాబాద్

రానున్న లోక్‌సభ ఎన్నికలు అత్యంత క్లిష్టమైనవిగా రాజకీయ నిపుణులు విశ్లేషిస్తున్నారు. వచ్చే ఎన్నికలలో ఏ రాజకీయ పార్టీ పూర్తి మెజారిటీని సాధించలేదని తెగేసి చెపుతున్నారు. నిజమే... ఇదివరకు జాతీయస్థాయి పార్టీల మధ్య మాత్రమే ద్విముఖ లేదా త్రిముఖ పోటీ ఉండేది. కానీ నేడు రాజకీయ ముఖ చిత్రం మారిపోయింది. ఆయా రాష్ట్రాలలోని ప్రాంతీయ పార్టీలు బలోపేతమయ్యాయి. ఉన్న పార్టీలకు తోడు కొత్తగా మరికొన్ని పార్టీలు పుట్టుకొస్తున్నాయి.

దీంతో జాతీయ పార్టీలన్నీ పునరాలోచనలో పడ్డాయి. ప్రాంతీయ పార్టీల సహకారం లేనిదే నెగ్గుకు రావడం కష్టమైన పని అని తెలుసుకున్నాయి. ఈ క్రమంలో ఇప్పటికే కాంగ్రెస్, భాజపాలు రెండూ ఆయా రాష్ట్రాల్లోని ప్రాంతీయ పార్టీలతో రహస్య మంతనాలు సాగిస్తున్నాయి.

మరోవైపు వామపక్షాలు తృతీయ కూటమిని మరింత పటిష్ట పరిచి ప్రభుత్వ ఏర్పాటుకు అవసరమైన బలాన్ని కూడగట్టి కాంగ్రెస్ పార్టీని కోలుకోలేని దెబ్బ తీయాలని అహరహం శ్రమిస్తున్నాయి.

ఇక అంతకుముందు ప్రధానమంత్రి పదవిని అధిష్టించిన దేవెగౌడ సైతం ప్రధాని పీఠంపై దృష్టి సారించినట్లు తెలుస్తోంది. ఇందులో భాగంగానే ఆయన ఆయా రాష్ట్రాలలోని ప్రాంతీయ పార్టీల నాయకులతో ప్రత్యేక సంభాషణలను సాగిస్తున్నారు. ఒరిస్సా ముఖ్యమంత్రి నవీన్ పట్నాయక్‌ను ఎలాగైనా తృతీయ కూటమిలోకి ఆకర్షించాలన్న ప్రయత్నం కూడా ఇందులో భాగంగానే జరుగుతున్నట్లు తెలుస్తోంది.

ఉత్తరప్రదేశ్ ముఖ్యమంత్రి మాయావతి సైతం ప్రధాని రేసులో ఉన్నారని ఇప్పటికే వార్తలు వచ్చాయి. ఈ దిశగా ఆమె అడుగులు వేస్తున్నట్లు తెలుస్తోంది. తమ పార్టీకి దేశ వ్యాప్తంగా ఆదరణ ఉందనీ, పార్టీ ప్రాబల్యం ఉన్న చోట్ల తమ అభ్యర్థులను పోటీకి నిలుపుతామని ఆమె పేర్కొన్నారు. ఇందులో భాగంగా ఆమె దక్షిణాది రాష్ట్రాలలో ఇటీవల కాలంలో బహిరంగ సభలలో పాల్గొంటూ వస్తున్నారు.

ఇక మన రాష్ట్రం విషయానికి వస్తే... మాజీ ముఖ్యమంత్రి తెలుగుదేశం పార్టీ అధ్యక్షుడు చంద్రబాబు నాయుడు సైతం ప్రధాని పదవిపై కన్ను వేశారని వార్తలు వస్తున్నాయి. వచ్చే లోక్‌సభ ఎన్నికలలో రాష్ట్రంలోని మొత్తం 42 స్థానాలకుగాను అత్యధిక స్థానాలను గెలుచుకుని ఓ నిర్ణయాత్మక శక్తిగా అవతరించాలని ఆయన ఉవ్విళ్లూరుతున్నట్లు సమాచారం.

ఇందులో భాగంగానే చంద్రబాబు యువరత్న బాలకృష్ణ, జూనియర్ ఎన్టీఆర్... ఇలా నందమూరి వారసులందరినీ రాష్ట్రంలో తలో దిక్కున ప్రచారం చేయించి అత్యధిక స్థానాలను కైవసం చేసుకోవాలని గట్టి పట్టుదలతో ఉన్నట్లు భోగట్టా.

మరి అన్ని సీట్లూ మావేనంటున్న కాంగ్రెస్, ప్రజారాజ్యం పార్టీల మధ్య తెలుగుదేశం ఆశలు ఎంతవరకూ నెరవేరతాయో వేచి చూడాల్సి ఉంది. మొత్తమ్మీద మాంద్యంలో సైతం వచ్చే ఎన్నికలలో డబ్బు ధారాపాతంగా పారుతుందని పలు సర్వేలు ఇప్పటికే ఎలుగెత్తి చాటుతున్నాయి. అధికారం దక్కించుకోవడంకోసం మన రాష్ట్రంలో పలు రాజకీయ నాయకులు కోటానుకోట్ల డబ్బులు కుమ్మరిస్తారన్న వాదనలు సైతం వినబడుతున్నాయి.

మరి ఇన్ని పార్టీలు, ప్రత్యామ్నాయాల నడుమ ఓటరన్న ఏ రాజకీయ పార్టీ నేతకు కిరీటం ధరింపజేస్తాడో వేచి చూడాలి.

2009-03-09T03:08:00.000-07:00

"హోలిక" అనే రాక్షసి ఎలా చనిపోయిందంటే..?

2009-03-09T02:00:00.001-07:00

ఎం ఎచ్ అహెసన్ / హైదరాబాద్

పూర్వం "హోలిక" అనే రాక్షసిని రఘుమహారాజు చంపినట్లు ఉన్న గాథతో పాటుగా మరో కథ కూడా ప్రాచుర్యంలో ఉంది. అదేమిటంటే..? హోలిక అనే రాక్షసి రోజుకో చంటి బిడ్డను తింటూ ఒక్కో గ్రామంపై విరుచుకుపడుతుండేదట. ఇలా ఒకరోజు ఒక ముదుసలి మనుమడి వంతు రాగా, అది గమనించిన వృద్ధురాలు హోలిక బారినుండి మనుమడితో పాటు ఆ గ్రామానికి చెందిన చంటి పిల్లలను కాపాడే దిశగా ఒక మహిమాన్వితుడైన మహర్షిని శరణువేడుకుంటుంది.

ఆ రాక్షసి ఓ శాపగ్రస్తురాలని, ఎవరైనా ఆ రాక్షసిని నోటికి రాని దుర్భాషలతో తిట్టినట్లైతే దానికి ఆయుష్షు క్షీణించి, మరణిస్తుందని ఋషి ఉపాయమిస్తాడు. దీంతో ఎంతో సంతోషంతో ఆ వృద్ధురాలు ఆ గ్రామవాసులకు ఈ విషయాన్ని చెప్పి, ఆ రాక్షసిని ఆ గ్రామస్తుల చేత అనరాని దుర్భాషలతో తిట్టిస్తుంది. ఆ దుర్భాషలను తట్టుకోలేక కొండంత "హోలిక" రాక్షసి కుప్పకూలి మరణిస్తుందని పురాణాలు చెబుతున్నాయి.

హోలిక మరణంతో పిల్లలు పెద్దలు ఆనందోత్సాహాలతో కేరింతలు కొడుతూ కట్టెలు ప్రోగుచేసి ఆ చితిమంటల్లో "హోలీ రాక్షసి"ని కాల్చివేసి వసంతాలు చల్లుకుంటూ పండుగ చేసుకుంటారు. ఈ రోజు నుంచే హోలి పండుగ ఆచారంలోకి వచ్చిందని పండితులు అంటున్నారు. ఇదేవిధంగా చైత్ర పాడ్యమి రోజున పితృదేవతలకు అర్ఘ్యమిచ్చి సంతృప్తి పరచి, హోలికా భూమికి నమస్కరిస్తే సర్వదుఃఖాలు తొలగి పోతాయని విశ్వాసం.

ఇకపోతే.. ఉత్తర భారతదేశంలో ప్రారంభించబడిన ఈ పండుగ అలా దక్షిణ భారత దేశానికి కూడా వ్యాపించింది. రాష్ట్రంలోని తెలంగాణా, రాయలసీమ ప్రాంతాలతో హోలి పండుగను ప్రస్తుతం వైభవంగా జరుపుకుంటున్నారు. చిన్నపెద్ద, ఆడ, మగ తేడా లేకుండా, రంగులు పులుము కుంటూ వసంతాలు చల్లుకుంటూ ఆనంద డోలికలతో తేలియాడుతుంటారు. ఇటువంటి ఆహ్లాదకరమైన హోలి పండుగ సందర్భంగా మనమందరం సుఖసంతోషాలతో జీవించాలని ఆశిద్దాం...!

హోలికా పూర్ణిమ... నడిచొస్తోంది మీ సౌందర్యవతి

2009-03-09T01:52:00.000-07:00

ఎం ఎచ్ అహెసన్ / హైదరాబాద్

సంవత్సరంలో చిట్ట చివరన వచ్చే పూర్ణమ ఈ హోళికా పూర్ణిమ. లోకంలో ఎవరికైనా చిట్ట చివరి సంతానం అంటే చెప్పలేనంత ఇష్టం. అలాగే ఏడాదిలో చివరిగా వచ్చే ఈ హోళికా పూర్ణిమ కూడాను. అందుకే పెద్దలు ఈ హోళికా పూర్ణిమను ఓ ఉత్సవంలా జరుపుకోవాలని నిర్ణయించారు. ఏడాది పొడవునా సుఖదుఃఖాల సమ్మిళతంగా సాగిపోయిన కాలానికి స్వస్తి చెపుతూ ఒకరిపై ఒకరు రంగులు చల్లుకుని ఆనంద సాగరంలో మునిగిపోతారు.

ఆ రోజన హోళీ జరుపుకున్న ప్రతి ఒక్కరు రంగులతో తడిసి నూతన సౌందర్యాన్ని తెచ్చుకుంటారు. నగలూ-నట్రా మంచి దుస్తులు వేసుకుంటేనే సౌందర్యంగా కనబడతారని చాలామంది అనుకుంటారు. కానీ మహాకవి పింగళి సూరన కళాపూర్ణోదయమనే కావ్యంలో అసలైన సౌందర్యం ఎక్కడుందో చెప్పాడు.

పూర్వం శాలీనుడనే పేరుగల నాయకుడుండేవాడు. అతనికి చక్కని శరీరము, సౌందర్యవతి అయిన సుగాత్రితో వివాహమైంది. వివాహమయ్యాక ఆమెను అతనితో పొందుకోసం మొదటిరాత్రి లోనికి పంపారు. ఆ రోజు రాత్రి ఏ మల్లెలూ వాడిపోలేదు. ఏ దుస్తులు నలగలేదు. అసలు ఆమెలో కించిత్ మార్పు సైతం కానరాలేదు.

ఒకటి.. రెండు.. మూడు రాత్రులు ఇదే రీతిలో గడిచిపోయాయి. రాత్రి వేళ ఆమె గదిలోకి వెళ్లడం... ఉదయాన ఎలా వెళ్లిందో అలానే తిరిగి రావడం జరిగింది. దాంతో ఆమె మానసికంగా కుంగి పోయింది. తన సౌందర్యాన్ని చూసి భర్తలో చలనం లేకపోవడంపై మధనపడింది.

ఈ పరిణామాలను గమనించిన బంధువులు పరిపరి విధాల ఆలోచించారు. ఇక ఆమె తల్లిదండ్రుల పరిస్థితి వర్ణనాతీతం. సంగతేమిటని అతణ్ణి అడిగేందుకు ఎవరూ సాహసించలేదు. భార్య సుగాత్రికి సైతం భర్త ఏమీ చెప్పలేదు. కానీ ఆమె మాత్రం గదిలోకి వెళ్లడం మానుకోనూ లేదు. ఇలా కాలం గడిచిపోతోంది.

ఒకరోజున అతను తన ఇంటి పెరటి చెట్లకు పాదులు చేస్తున్నాడు. భర్త పాదులు చేయడాన్ని చూసి తను పాదులకు నీరు పోసేందుకు సిద్ధమైంది. పని చేసేది తోటలో కదా.. అని ఆమె తన ఆభరణాలను తీసేసి భర్తను ఆకర్షించాలనే ధోరణితో కాక కేవలం సహజ సౌందర్యంతో చక్కగా ఒంపు సొంపులతో చెట్లకు నీళ్లు పోయడం ఆరంభించింది. ఒకానొక సందర్భంలో అతడు భార్య నీళ్లు పోయడాన్ని గమనించాడు. చిత్రం.. ఆమె అద్భుత సౌందర్యరాశిగా అతనికి తోచింది.

ఒక్క ఉదుటున భార్య దగ్గరకు వెళ్లాడు. ఆమే భుజం మీద చేయి వేశాడు. కలిసి నడిపించాడు. శరీరాల్లో విద్యుత్తు ప్రవహించింది. కాలానికే సిగ్గేసింది. కథ సుఖాంతమైంది. తల్లిదండ్రులు, బంధువుల ఆందోళన అటకెక్కింది.

ఎందుకిలా జరిగిందీ అంటే... అప్పటి వరకూ ఆమె సకలాభరణాలతో తన సహజ సౌందర్యాన్ని దాచేసింది. నేడు తోట పనిలో సౌందర్యాన్ని భర్త చూసి వివశుడైనాడు. ఆమె జీవితంలో వేయి పున్నములు విరిసాయి.

ఇలాంటి సహజ సౌందర్యం ప్రకృతిలో కనిపించేంది ఖచ్చితందా ఈ శిశిర ఋతువులోనే. ఈ ఫల్గుణ మాసంలోని పూర్ణిమనాడు వికసించే చంద్ర కాంతికి స్త్రీ పురుషుల మనస్సు ఆకాశం నుంచి విరబూసే వెండివెన్నెలలో విహరించాలని తహతహ లాడుతుంది. అందుకే మన పెద్దలు ఈ హోలికా పూర్ణిమను ఫల్గుణ పూర్ణిమనాడు ఏర్పాటు చేశారు.

డబ్బుతో బ్యాట్-బ్యాలట్ వార్!

2009-03-05T23:10:00.000-08:00

ఎం ఎచ్ అహెసన్ / హైదరాబాద్

ఒకవైపు టి20 క్రికెట్ సంబరాలు తెస్తున్న ఐపిఎల్ టోర్నమెంట్, మరోవైపు ఉత్కంఠభరితంగా జరగబోతున్న సార్వత్రిక ఎన్నికలు ఈ ఏడాది ఎండాకాలాన్ని మరింతగా మండించబోతున్నాయి. ఏప్రిల్ 16, మే 16 మధ్య 15వ సార్వత్రిక ఎన్నికలు; ఏప్రిల్ 10 నుంచి మే 24 మధ్య ఇండియన్ ప్రీమియర్ లీగ్ రెండవ టోర్నీ పోటాపోటీగా జనం ముందుకు దూసుకురాబోతున్నాయి. జనం ఊహాశక్తిని గౌరవిస్తూనే, పార్టీల ఆర్భాటపు ప్రచారంతోను, మెలితిరిగిన డబ్బు యంత్రాలతోను బూత్, బ్యాట్ సమరాలు 'మరీ అతిగా' కనిపిస్తుంటే ఆశ్చర్యపోకండి. రాజకీయ ర్యాలీలకు హాజరు కావాలా లేక క్రికెట్ పోటీలకు వెళ్ళాలా లేక పోలింగ్ కేంద్రాలు, స్టేడియాల వద్ద ఎన్నికల కమిషన్, ఐపిఎల్ నిర్వాహకులు నియోగించే వేలాది మంది భద్రతా సిబ్బంది మధ్య పీల్చుకోవడానికి స్వచ్ఛమైన గాలిని ఎలా వెతకాలా అనే డైలమా గురించి ఇక్కడ ప్రస్తావించడం లేదు.

ఇది ఆర్థిక వ్యవస్థ గురించి చర్చా కాదు. వనరులకు కొరత ఉన్నప్పుడు ఎలా సర్దుకుపోవాలా అనే మానవ ప్రవర్తనను అధ్యయనం చేసే సైన్స్ గురించిన చర్చా కాదు. ఈ ఆర్థిక మాంద్యం సమయంలో డబ్బుకు గల ప్రాధాన్యం గురించే ఇక్కడ ప్రస్తావిస్తున్నాం. మెరుగైన భవిత కోసం జాతి పెట్టుకున్న ఆశలతో ఆడుకునే ఖద్దరు ధారులకు, ఫ్లడ్ లిట్ స్టేడియాలలో రంగు రంగుల పైజామాలు ధరించి ఆడే క్రీడాకారులకు పుష్కలంగా ఆ వ్యక్తులే నిధులు సమకూరుస్తుంటారు. డబ్బు సంచులు ఇతోధికంగా ఉన్న సంస్థలు ఖద్దరుధారులకు వోటు వేయవచ్చు. క్రికెట్ ఒక క్రీడ మాత్రమే. కాని బడా వాణిజ్యవేత్తలను వాణిజ్య లావాదేవీలు కొనసాగించేటట్లు చేసే క్రీడ రాజకీయం.

ఆరు వారాల ఐపిఎల్ రెండవ సర్కస్ (టోర్నీ) 'భద్రమైనదే' అని, 'ఎందుకంటే స్పాన్సర్లతో దీర్ఘ కాలిక కాంట్రాక్టులు ఇప్పటికే కుదుర్చుకున్నాం' అని ఐపిఎల్ కమిషనర్ లలిత్ మోడి స్పష్టం చేస్తున్నారు. ఆయన మాటలకు 'మా స్పాన్సర్లు, భాగస్వాములు ఇప్పటికీ మాతోనే ఉన్నారు. ఇతర స్పాన్సర్లు ఇప్పుడున్నవారి కన్నా ఎక్కువ చెల్లించేందుకు సుముఖంగా ఉన్నారు' అని మరొక అర్థం తీసుకోవచ్చు. అయితే, పటిష్ఠమైన బిజినెస్ మోడల్స్ (రాజస్థాన్ రాయల్స్, కోలకతా నైట్ రైడర్స్)కు సంబంధించిన ఫ్రాంచైజీలు ప్రస్తుతానికి ఆర్థికపరంగా ఫర్వాలేదనే స్థితిలో ఉన్నారనేది నిజమే. కాని మాంద్యం ముంచేదే కానీ తేల్చేది కాదు కదా.

ఐపిఎల్ రెండవ సీజన్ సమస్యలతో మొదలు కాబోతున్నది. ఫ్రాంచైజీలు బడ్జెట్ కష్టాలను ఎదుర్కొంటున్నారు. ప్రకటనకర్తల కోసం బ్రాడ్ కాస్టర్ ఆత్రంగా ఎదురుచూస్తున్నది. కార్పొరేట్ సంస్థల తాయిలాలు తగ్గిపోయాయి. ఐపిఎల్ ను 'ఇండియన్ ప్రాబ్లెమ్స్ లీగ్'గా తిరిగి నామకరణం చేయవలసి వచ్చేటట్లుంది. ఒక్కసారి ఈ దిగువన పేర్కొన్న పరిస్థితిని విశ్లేషించండి. బజాజ్ అలియన్జ్ తో ఒప్పందం కుప్పకూలిన తరువాత టీమ్ స్పాన్సర్ రాజస్థాన్ రాయల్స్ కు ఇంతవరకు దొరకలేదు. ఇక హెచ్ డిఐఎల్ కోలకతా నైట్ రైడర్స్(కెకెఆర్) తో తమ ఒప్పందాన్ని రద్దు చేసుకుంది. కెకెఆర్ కు నోకియాతో గల రూ. 15 కోట్ల ఒప్పందాన్ని రెన్యూ చేసుకొంటే తక్కువ మొత్తం కోసం సంప్రదింపులు జరపవలసి రావచ్చు. దక్కన్ చార్జర్స్ ను టీమ్ స్పాన్సర్ జెపీ గ్రూప్ గుడ్ బై కొట్టింది. ఎయిర్ సెల్ తో చెన్నై సూపర్ కింగ్స్ కు గల రూ. 13.6 కోట్ల ఒప్పందం కూడా ధరల కోతను ఎదుర్కోవలసి రావచ్చు.

టివి ప్రకటనల స్లాట్ రేట్లు పది సెకన్లకు రూ. 4 లక్షలకు పెంచడంతోను, ఒక్కొక్కరు కనీసం రూ. 20 కోట్ల మేర నిధుల కొరతను ఎదుర్కొంటున్న ఫ్రాంచైజీలు లాభాలు ఆర్జించే ఉద్దేశంతో స్టేడియాల లోపల ప్రకటనల ధరలను పెంచడంతోను 2008లో చేతికి ఎముక లేనట్లుగా ఖర్చు చేసిన కార్పొరేట్ సంస్థలు ఇప్పుడు అదే తీరులో తమ నిధులను వెచ్చించే అవకాశం లేకపోవచ్చు. పైగా టిక్కెట్లపై పది శాతం వినోదపు పన్ను వసూలు చేస్తుండడం వల్ల ఐపిఎల్ మ్యాచ్ ల వీక్షణ ఖరీదైన వ్యవహారం కాగలదు.

రాజకీయ ర్యాలీలు టిక్కెట్లు లేని వ్యవహారాలు. అయితే, భారత క్రికెట్ కంట్రోల్ బోర్డు (బిసిసిఐ) మార్కెటింగ్ కమిటీ సభ్యుడు, మాజీ అధ్యక్షుడు ఐఎస్ బింద్రా వాదన మరొక విధంగా ఉంది. 'ఒక స్పాన్సర్ తప్పుకుంటే మరొక స్పాన్సర్ వస్తారు' అని ఆయన అంటున్నారు. కావచ్చు. షేర్ విలువలు పతనం అవుతున్నప్పుడు, కార్మికులను తొలగిస్తున్నప్పుడు, టివి ప్రకటనల స్లాట్ లపై దండిగా ఖర్చు చేయడం, గ్రాండ్ స్టాండ్ లలో కార్పొరేట్ బాక్స్ లు, బౌండరీ లైన్ పొడవునా హోర్డింగ్ లు వ్యాపారాన్ని అర్థవంతం చేయవు. గణాంకాలు సరైనవి కావు. చివరకు బికినీ కూడా తక్కువే.

గాలిలో తేలుతున్న కాంగ్రెస్!

2009-03-05T23:08:00.000-08:00

ఎం ఎచ్ అహెసన్ / హైదరాబాద్

డాక్టర్ మన్మోహన్ సింగ్ నాయకత్వంలోని యుపిఎ ప్రభుత్వం సాధించిన విజయాలు, తన అధిష్ఠానంలోని యువత, అనుభవజ్ఞుల సమ్మేళనం వల్ల రానున్న ఎన్నికలలో తనదే పైచేయి కాగలదని కాంగ్రెస్ దృడంగా విశ్వసిస్తున్నది. అంతేకాకుండా వీటితో సైద్ధాంతికంగా అతివాద, మితవాద ప్రతిపక్షాలను దీటుగా ఎదుర్కోగలమని కూడా కాంగ్రెస్ విశ్వసిస్తున్నది. ఎన్నికలకు ముందు ప్రతిపక్షాలకు ఆయుధాలు కాగలవనుకున్న సమస్యలను తాము విజయవంతగా పరిష్కరించగలిగినట్లు అధిష్ఠానం భావిస్తుండడమే కాంగ్రెస్ శిబిరంలో ఎన్నికల ముందు ఈ విశ్వాసం, సంతుష్టికి చాలా వరకు కారణం.

'మమ్మల్ని ఎండగట్టేందుకు ప్రతిపక్షాలకు ఒక్క అంశం కూడా లేదు. ఉగ్రవాదం, ద్రవ్యోల్బణం, ఆంతరంగిక భద్రత, మతపరమైన ఉద్రిక్తత వంటి అంశాలపై మా పని తీరు అత్యున్నత స్థాయిలో ఉంది' అని ఎఐసిసి ప్రధాన కార్యదర్శి, పార్టీ ప్రచార కమిటీ చైర్మన్ దిగ్విజయ్ సింగ్ పేర్కొన్నారు. ఎన్నికలు కనుక క్రితం సంవత్సరం వేసవిలో జరిగి ఉన్నట్లయితే పార్టీ ఇరకాటంలో పడి ఉండేదేనని పార్టీ ఆంతరంగికులు అంగీకరించారు. అయితే, గడచిన కొన్ని నెలలలో, ముఖ్యంగా క్రితం సంవత్సరం చివర్లో జరిగిన అసెంబ్లీ ఎన్నికల అనంతరం పరిస్థితి కాంగ్రెస్ కు అనుకూలంగా మారిపోయిందని వారు భావిస్తున్నారు.

'క్రితం సంవత్సరం ఇదే సమయంలో మాకు అవకాశాలు చాలా దారుణంగా ఉన్నాయి. కాని అణు ఒప్పందంపై ప్రభుత్వం అనుసరించిన నిర్ణయాత్మక వైఖరి, పాకిస్తాన్ పట్ల వ్యవహరణలో కనబరిచిన దృఢచిత్తం వల్ల మా అవకాశాలు మెరుగయ్యాయి' అని కాంగ్రెస్ రాజకీయ వ్యూహకర్త ఒకరు వ్యాఖ్యానించారు. జాతీయ స్థాయిలో పొత్తులు పెట్టుకోరాదన్న కాంగ్రెస్ నిర్ణయం దాని మిత్ర పక్షాలు కొన్నిటికి ఆగ్రహం తెప్పించినప్పటికీ, అది ఎన్నికల ముందు తాజాగా మమతా బెనర్జీ నాయకత్వంలోని తృణమూల్ కాంగ్రెస్ ను మిత్రపక్షంగా చేసుకున్నది. ఇప్పుడు తన ఎన్నికల వ్యూహం పక్కాగా ఉందని కాంగ్రెస్ భావిస్తున్నది. తన మిత్ర పక్షాలు, ముఖ్యంగా ఆర్ జెడి, డిఎంకె 2004 నాటి ఫలితాలను తిరిగి పొందలేకపోవచ్చునని, అందువల్ల తన సొంత బలాన్ని మెరుగుపరచుకోవలసిన అవసరం ఉందని కాంగ్రెస్ ఆలోచన.

2004 ఎన్నికలలో కాంగ్రెస్ 545 సీట్లలో 375 సీట్లకు పోటీ చేసింది. కాని ఈ దఫా ఆ సంఖ్యను పెంచుకోవాలని కాంగ్రెస్ కోరుకుంటున్నది. ఆ దిశగా తన మిత్ర పక్షాలతో బేరసారాలను కాంగ్రెస్ ప్రారంభించింది. కాంగ్రెస్ అనుసరిస్తున్న ఈ వ్యూహం కొన్ని మిత్ర పక్షాలతో ఉద్రిక్తతలకు దారి తీసింది. ఎన్ సిపి మహారాష్ట్రలో అధిక వాటాతో పాటు జాతీయ స్థాయిలో మిత్ర పక్షాలకు కనీసం 50 సీట్లు కేటాయించాలని కోరుతున్నది. ఇక ఎస్ పి అయితే యుపిలో సీట్లను వదలుకోవడంలో పీనాసితనం చూపుతున్నది.

ఆంధ్ర ప్రదేశ్, మహారాష్ట్ర, హర్యానా రాష్ట్రాలలో కూడా పార్టీ సీట్ల సంఖ్య తగ్గగలదని కాంగ్రెస్ రాజకీయ వ్యూహకర్తలు గ్రహించారు. ఆంధ్ర ప్రదేశ్ లో కాంగ్రెస్ క్రితం సారి 31 సీట్లను గెలుచుకున్నది. ఈ సారి ఈ సంఖ్య 20కి తగ్గిపోవచ్చునని ఆంతరంగిక మదింపు సూచిస్తున్నది. అయితే, పంజాబ్, రాజస్థాన్, కేరళ, ఛత్తీస్ గఢ్ రాష్ట్రాలలో తన సీట్ల సంఖ్యను పెంచుకోవడం ద్వారా ఈ నష్టాలను భర్తీ చేసుకోవచ్చునని కాంగ్రెస్ ఆశిస్తున్నది. కాంగ్రెస్ క్రితం సారి పంజాబ్ లో 13కు రెండు సీట్లను, రాజస్థాన్ లో 25కు రెండు సీట్లను, ఛత్తీస్ గఢ్ లో 11కు ఒక సీటును గెలుచుకోగా కేరళలో 20కి ఒక్కటి కూడా గెలుచుకోలేకపోయింది.

బాలీవుడ్ లో భార్యల సెగలు

2009-03-05T23:07:00.000-08:00

ఎం ఎచ్ అహెసన్ / హైదరాబాద్

ప్రతి పురుషుడి విజయం వెనక ఒక స్త్రీ ఉంటుందని అంటారు. బాలీవుడ్ లో విజయాలు సాధిస్తున్న నటులను చూస్తుంటే అది నిజమే అనిపిస్తోంది. షారూఖ్ ఖాన్ బార్య గౌరీ ఖాన్ ఓం శాంతి ఓంలో దర్శనమిచ్చి అందరినీ ఆశ్చర్యపరిచింది. ఆ సినిమాకు ఆమె నిర్మాత కూడా. ఆమె తానేమిటో నిరూపించుకోవడానికి సిద్ధపడింది.

అందాల సుందరి ఐశ్వర్యారాయ్ గురించి చెప్పనే అక్కర్లేదు. బాలీవుడ్ నటుడు అభిషేక్ బచ్చన్ ను పెళ్లి చేసుకున్న ఆమె తన సినిమాల్లో నటిస్తూనే ఉంది. మధ్య వయస్సులోనూ కుర్రకారు అభిమాన నటిగా మన్ననలు అందుకుంటూనే ఉంది. అంతర్జాతీయ స్థాయిలో పేరు సంపాదించిన మొదటి బాలీవుడ్ నటిగా కూడా ఆమెను చెప్పుకోవచ్చు. ఇక, జయా బచ్చన్ గురించి కూడా చెప్పుకోవాలి. అమితాబ్ బచ్చన్ ను పెళ్లి చేసుకున్న ఆమె ఇప్పుడు నిండా రాజకీయాల్లో మునిగిపోయారు. సమాజ్ వాదీ పార్టీ పార్లమెంటు సభ్యురాలిగా ఆమె తన బాధ్యతలు నిర్వహిస్తోంది.

అమీర్ ఖాన్ గజినీ సినిమాతో 2008లో అతి పెద్ద స్టార్ గా ముందుకు వచ్చాడు. ఆయన భార్య కిరణ్ రావు దర్శకత్వ బాధ్యతలు నిర్వహించే ఆలోచనలో ఉంది. అమీర్ ఖాన్ తో కలిసి ఆమె సినిమాలకు పని చేసింది కూడా. రితిక్ రోషన్ భార్య సుజన్నే బాలీవుడ్ వైపు ఎప్పుడూ దృష్టి పెట్టలేదు. కానీ ఆమె దృష్టి ఇప్పుడిప్పుడే ఇటు వైపు మళ్లుతోందట. సంజయ్ దత్ తన భార్య మాన్యతను పబ్లిక్ గా ముందుకు రాకుండా చాలా కాలం చూశాడు. అయితే పెళ్లి చేసుకున్న తర్వాత మాత్రం సంజయ్ మాన్యత భర్తగానే గుర్తింపు పొందుతున్నాడు.

అర్బాజ్ ఖాన్ భార్య మలైకా అరోరా ఖాన్ బాలీవుడ్ లో ఒక హాట్ టాపిక్. ఆమెకు సల్మాన్ ఖాన్ తో సంబంధాలున్నాయనే ప్రచారం ఉంది. షారూఖ్ ఖాన్ తోనూ స్నేహం కొనసాగిస్తోంది. సల్మాన్, షారూఖ్ ల మధ్య పచ్చగడ్డి వేస్తే భగ్గుమంటున్నప్పటికీ ఆమె ఇద్దరితోనూ తన స్నేహాన్ని కొనసాగించ గలుగుతోంది. టెన్షన్లు, వివాదాలు చెలరేగినప్పటికీ ట్వింకిల్ ఖన్నా అక్షయ్ కుమార్ ను వివాహమాడింది. పెళ్లయిన తర్వాత అక్షయ్ కుమార్ కు గర్ల్ ఫ్రెండ్ శిల్పా శెట్టి కంటికి అనకుండా చేయగలిగింది. దాదాపు దశాబ్దం తర్వాత శిల్పా శెట్టి, అక్షయ్ కుమార్ బిగ్ బాస్ షోలో వేదికను పంచుకున్నారు.

సూపర్ స్టార్ అయిన కాజోల్ అజయ్ దేవగన్ భార్య అయింది. కూతురు కోసం ఆమె నటనను వదులుకుంది. మళ్లీ ఆమె తన నట జీవితాన్ని కొనసాగించే ఉద్దేశంతో ఉంది. షారూఖ్ తో కలిసి నటించేందుకు ఒక సినిమాకు ఆమె అంగీకారం తెలిపినట్లు తెలుస్తోంది. మాధురీ దీక్షిత్ కు బాలీవుడ్ వైఫ్ గా పేరుంది. ఆమె భర్త సినిమా పరిశ్రమకు చెందినవాడు కాదు. పెళ్లయిన తర్వాత ఆమె కొన్ని సినిమాల్లో నటించినప్పటికీ పెద్దగా లాభం లేకపోయింది.

ఇక హేమమాలిని గురించి చెప్పుకోవాల్సి వస్తే, ఇప్పటి బాలీవుడ్ భార్యలకు ముందు తరం నటే అయినప్పటికీ అందాన్ని కాపాడుకోవడంలో ఆమె ఆదర్శంగా నిలుస్తోంది. అంతేకాకుండా తన భర్త ధర్మేంద్ర కన్నా విజయవంతమైన స్త్రీగా నిలిచింది.

డిఎస్ కోటపై వైఎస్ కన్ను!

2009-03-05T23:06:00.000-08:00

ఎం ఎచ్ అహెసన్ / హైదరాబాద్

ఒకే దెబ్బకి రెండు పిట్టల్ని కొట్టాలని చాలామంది అనుకుంటారు. అదే మన ముఖ్యమంత్రి రాజశేఖర రెడ్డి అయితే మూడు పిట్టల మీద గురి పెట్టినట్టు కనిపిస్తోంది. కేంద్ర మంత్రి ఎస్.జైపాల్ రెడ్డి, పిసిసి అధ్యక్షుడు డి.శ్రీనివాస్, ఎంపి మధు యాష్కి గౌడ్ ఆ మూడు పిట్టలు. బుధవారం జరిగిన కాంగ్రెస్ ఎన్నికల(సంబంధిత)సమావేశంలో వైఎస్ నిజామాబాద్ లోక్ సభ స్థానానికి పార్టీ అభ్యర్ధిగా అసెంబ్లీ స్పీకర్ సురేశ్ రెడ్డి పేరును ప్రతిపాదించి బాంబు పేల్చారు. 'కేంద్ర మంత్రి జైవాల్ రెడ్డిలా రెడ్డి కులానికి చెందిన, ఇంగ్లీషులో అనర్గళంగా మాట్లాడ గలిగే, స్పీకర్ అనుభవంతో పార్లమెంటరీ నడవడికను ఆకలింపు చేసుకున్న యువ నాయకుడిని రంగంలోకి దించి జైపాల్ ను తెరమరుగు చేయడం ముఖ్యమంత్రి లక్ష్యం.

ఈ ఎత్తు అటు లోక్ సభకు వెళ్లాలనుకుంటున్న పిసిసి అధ్యక్షుడు డి.శ్రీనివాస్, ఇటు తెలంగాణా కావాలంటూ గొంతు చించుకుంటున్న నిజామాబాద్ ఎంపి మధు యాష్కి ల ఆటకట్టించడానికే' అని కాంగ్రెస్ నాయకుడొకరు వివరించారు. ముఖ్యమంత్రి ప్రతిపాదనను పిసిసి అధ్యక్షుడు గట్టిగా వ్యతిరేకించడంతో, ఎఐసిసి ప్రధాన కార్యదర్శి వీరప్ప మొయిలీతో రాష్ట్ర కాంగ్రెస్ ఎన్నికల కమిటీ గురివారం సమావేశమైనప్పుడు తీవ్ర వాగ్వివాదాలు చెలరేగవచ్చు. లోక్ సభ, అసెంబ్లీ స్థానాలకు పోటీ చేసే కాంగ్రెస్ అభ్యర్ధుల పేర్లను ఖరారు చేసి, దానిని ఎఐసిసి కేంద్ర ఎన్నికల కమిటీకి పంపించడానికి ఈ సమావేశం జరుగుతోంది. కేంద్ర కమిటీ న్యూఢిల్లీలో మార్చి 8న సమావేశమవుతుంది.

ముస్లిం జనాభా గణనీయమైన సంఖ్యలో గల నిజామాబాద్ నియోజకవర్గం కాంగ్రెస్ పార్టీకి కంచుకోట. ఆందువల్ల తాను ఈసారి ఎన్నికల్లో ఈ నియోజకవర్గం నుంచి పోటీ చేయదలచుకున్నట్టు చాలాసార్లు సూచనప్రాయంగా చెప్పారు. ప్రస్తుతం నిజామాబాద్ మేయర్ అయిన తన కుమారుడు ధర్మపురి సంజయ్ కు నిజామాబాద్ అసెంబ్లీ నియోజకవర్గం టిక్కెట్ ఇప్పించి, తాను లోక్ సభకు వెళ్లాలన్నది శ్రీనివాస్ వ్యూహం. నిజామాబాద్ అసెంబ్లీ స్థానానికి ప్రస్తుతం ఆయన ప్రాతినిధ్యం వహిస్తున్నారు. ఒకానొక సమయంలో ఈ స్థానానికి మాజీ క్రికెటర్ మహమ్మద్ అజారుద్దీన్ పేరును కూడా శ్రీనివాస్ ప్రతిపాదించారు. అంతే కాకుండా సిట్టింగ్ ఎంపి మధు యాష్కి గౌడ్ మళ్లీ ఈ స్థానాన్ని ఆశిస్తున్నప్పటికీ, తనకు మార్గం సుగమం చేసుకోడానికి పిసిసి అధ్యక్షుడు పావులు కదుపుతున్నారు.

'నిజామాబాద్ లోక్ సభ టిక్కెట్ ను 2004లో మధుకు ఇప్పించింది పిసిసి అధ్యక్షుడే. అయితే ఇప్పుడాయన(మధు) ముఖ్యమంత్రి అభిమానం కోల్పోయినందున, ఆ సీటు తాను దక్కించుకోవడం సులభమని శ్రీనివాస్ భావించారు. అంతే కాకుండా కాంగ్రెస్ అధిష్టానానికి సన్నిహితుడైన యాష్కి ఎక్కడి నుంచైనా సీటు సంపాదించుకోగలరు' అని శ్రీనివాస్ విధేయుడొకరు చెప్పారు. ఇప్పుడు, స్పీకర్ సొంత నియోజకవర్గం బాలకొండ నియోజకవర్గాల పునర్విభజనలో మార్పు చెందకపోయినప్పటికీ, నిజామాబాద్ లోక్ సభ నియోజకవర్గానికి సురేశ్ రెడ్డి పేరును వైఎస్ ప్రతిపాదించడంతో పిసిసి అధ్యక్షుడి విధేయులు అవాక్కయ్యారు. అయితే తగినన్ని అర్హతలుగల సురేశ్ రెడ్డి కేంద్ర మంత్రివర్గంలో జైపాల్ రెడ్డికి సరైన ప్రత్యామ్నాయం కాగలరన్నది ముఖ్యమంత్రి విధేయుల వాదన. గురువారం సమావేశంలో ఏకాభిప్రాయం కుదరకపోతే సురేశ్ రెడ్డి, శ్రీనివాసం, మధు యాస్కీల పేర్లు పార్టీ అధిష్టానవర్గం పరిశీలనకు వెళ్తాయని కాంగ్రెస్ వర్గాలు చెబుతున్నాయి.

'చిరు' తెలంగాణ మాయ

2009-03-05T23:05:00.001-08:00

ఎం ఎచ్ అహెసన్ / హైదరాబాద్

పలు దాగుడు మూతల తర్వాత తెలంగాణ రాష్ట్ర సమితి (తెరాస) పొత్తుల విషయంలో ఒక నిర్ణయానికి వచ్చింది. తెలుగుదేశం పార్టీతో వచ్చే ఎన్నికల్లో జత కట్టాలని నిర్ణయం తీసుకుంది. తద్వారా తెలుగుదేశం, సిపిఐ, సిపిఎంలతో ఏర్పడిన మహా కూటమిలో భాగస్వామి అయింది. ఇది ప్రజారాజ్యం పార్టీ అధినేత చిరంజీవికి ఏ మాత్రం మింగుడు పడడం లేదని అర్థం అవుతూనే ఉంది. ఆయన మాటలే ఆ విషయాన్ని పట్టిస్తున్నాయి. తెరాసతో పొత్తు కోసం చిరంజీవి తీవ్ర ప్రయత్నాలే చేశారని అనుకోవాల్సి ఉంటుంది. తెరాస కలిసి రాకపోవడంతో తీవ్ర నిరాశకు గురైన చిరంజీవి తెరాసపై విమర్శలకు దిగుతున్నారు. దీన్నే రోజా ఈ విధంగా అన్నారు - చిరంజీవి స్పందన ప్రేమించిన అమ్మాయిని రాకపోవడంతో నిరాశ చెందిన ప్రేమోన్మాది మాటల్లా ఉన్నాయి. అలా అనడం ఎక్కువ చేసి చెప్పడం కావచ్చు. కానీ చిరంజీవికి నిరాశ మాత్రం తప్పలేదని చెప్పవచ్చు.

తమ లక్ష్యం సామాజిక తెలంగాణ అని, అది నచ్చకనే తెరాస అధ్యక్షుడు కె. చంద్రశేఖర రావు తమతో కలిసి రావడానికి ఇష్టపడి ఉండకపోవచ్చునని ఒక సన్నాయి నొక్కు నొక్కారు. తెలంగాణకు ప్రీఫిక్స్ ల గొడవ ఎక్కువే. ప్రజా తెలంగాణ, ప్రజాస్వామిక తెలంగాణ వంటి లక్ష్యాల కోసం కొంత మంది పని చేస్తూనే ఉన్నారు. ఈ స్థితిలోనే ముందు భౌగోళిక తెలంగాణను సాధించుకుందామని, ఆ తర్వాత ఇతర తెలంగాణల కోసం పోరాటాలు చేయవచ్చునని కెసిఆర్ మొదట్లోనే ఉన్నారు. తెలంగాణలు అలా ఉండగానే నవ తెలంగాణ పార్టీ (ఎన్టీపి) నేత టి. దేవేందర్ గౌడ్ సామాజిక తెలంగాణ అనే నినాదాన్ని ముందుకు తెచ్చారు. ఈ నినాదాన్నే చిరంజీవి అందుకున్నారు. దీంతో చిరంజీవికి, దేవేందర్ మధ్య సాపత్యం కుదిరింది. ఇరువురు కలిసి పని చేయడానికి వీలు కలిగిందని అనుకోవాలి.

సామాజిక కోస్తా, సామాజిక రాయలసీమల వంటి మాటలు మాట్లాడకుండా సామాజిక తెలంగాణ అని మాత్రమే మాట్లాడడంలోని ఆంతర్యం ఏమిటనేది ప్రశ్న. సామాజిక న్యాయం జరగాలనే విషయాన్ని తెలంగాణ రాష్ట్రాన్ని కోరుకుంటున్న చాలా మంది మేధావులు కోరుకుంటున్నారు. అలాగే ప్రజాస్వామిక తెలంగాణనో, ప్రజా తెలంగాణనో వస్తే అంతకన్నా కావాల్సిందేమిటనేది కూడా ఉంది. కానీ అవి ఇప్పుడిప్పుడే సాధ్యమయ్యే విషయాలు కావని, ఈ లోగా తెలంగాణ పూర్తిగా నష్టపోకుండా, కనీసం పౌర హక్కుల పరిరక్షణకైనా, పౌర హక్కుల కోసం పోరాడే వెసులుబాటు కోసమైనా తెలంగాణ రాష్ట్ర సాధన అవసరమనే భావనను అంగీకరించడానికి చిరంజీవి గానీ, దేవేందర్ గౌడ్ గానీ సిద్ధంగా లేరు. అలా లేకపోవడానికి ఉండాల్సిన కారణాలున్నాయి.

తెరాస తెలుగుదేశం పార్టీతో పొత్తు పెట్టుకోవడాన్ని వ్యతిరేకించే విషయంలో మావోయిస్టులకున్న కారణాలు మావోయిస్టులకున్నాయి. వారి వైఖరి వారికి ఉంటుంది. ఎవరి వైఖరి ఉండడం, ఇతర వైఖరులు ఉంటాయని అంగీకరించడం ప్రజాస్వామిక వైఖరి అవుతుంది. ఈ ప్రజాస్వామిక వైఖరిని గౌరవించాల్సి అవసరం ఉంటుంది. అయితే, ఇతర వైఖరులపై విమర్శలు చేయడం తప్పు కాదు. ఆ హక్కు మావోయిస్టులకు ఉంది. తెలంగాణ సాధన కోసం తాను ఒక విధానాన్ని ఎంచుకునే హక్కు కెసిఆర్ కు ఉంటుంది. అదే పని కెసిఆర్ చేశారు. రేపు ప్రజలే ఆయన వైఖరిపై తేల్చి చెబుతారు.

గతంలో సమైక్యాంధ్రకు కట్టుబడిన తెలుగుదేశం పార్టీ ఇప్పుడు తన వైఖరిని మార్చుకుంది. తెలంగాణకు అనుకూలంగా చాలా ముందుకు వచ్చింది. అలా విధానాలు మార్చుకోవడం తప్పేం కాదు. ప్రజాభిప్రాయానికి అనుగుణంగా విధానాలు మార్చుకోవడం ముందుకు సాగడమే అవుతుంది. ఈ రీత్యానే కెసిఆర్ చంద్రబాబుతో కలిశారు. సామాజిక తెలంగాణ సాధన అంటున్న చిరంజీవి తెలంగాణ సాధనకు ఏం కొలికి పెడతారో అర్థం కాని పరిస్థితి ఉంది. అందువల్ల చిరంజీవితో పొత్తు కాంగ్రెసుతో పొత్తులా మారినా ఆశ్చర్యం లేదు. ఎన్నికల్లో గెలవడానికే చిరంజీవి తెలంగాణ అంశాన్ని అందుకున్నారనేది ఎవరికీ తెలియని విషయం కాదు. చంద్రబాబుది కూడా అదే ఉద్దేశం కావచ్చు. కానీ వీరిద్దరి వైఖరుల్లో ఎవరి వైఖరి తెలంగాణ రాష్ట్ర సాధనకు అనుకూలంగా ఉంది, దాన్ని సాధించడానికి వచ్చే ఎన్నికల్లో బలాబలాల తీరు ఎలా ఉంటుంది వంటి అంశాలను పరిగణనలోకి తీసుకోవాల్సి ఉంటుంది.

ఏ పార్టీకి, ఎన్ని నిధులు?

2009-03-05T22:59:00.000-08:00

ఎం ఎచ్ అహెసన్ / హైదరాబాద్

ఈ పర్యాయం ప్రధాన రాజకీయ పార్టీలు తమ నిధుల కోసం ఏ సంస్థలపై ఆధారపడుతున్నాయి? పార్టీలకు ఎన్నికల కోసం అందే విరాళాలలో అధిక భాగం నల్ల ధనమేననే సంగతి విదితమే. కాని ఇటీవలి కాలంలో పార్టీలకు నిధులు సమకూరుస్తున్నప్రముఖ భారతీయ కార్పోట్ సంస్థల గురించి నిశితంగా పరిశీలిస్తే ఎవరు, ఎవరికి, ఎంత మేరకు నిధులు సమకూరుస్తున్నారో విదితం కాగలదు. కార్పొరేట్ కంపెనీలు ఇచ్చిన విరాళాలను బట్టి చూస్తే ఏ కార్పొరేట్ కంపెనీలు ఏ పార్టీని భుజానికి ఎత్తుకున్నాయో కూడా స్పష్టం కాగలదు.

అయితే, ఈ కంపెనీలలో కొన్ని మాత్రం విరాళాలు ఇచ్చే విషయంలో తమ రాజకీయ అభిమతం వెల్లడి కాకుండా జాగ్రత్తలు పాటించాయి. ఇలాంటి కంపెనీలు దేశంలోని ప్రధాన పార్టీలన్నింటికి తమ విరాళాలను దాదాపుగా సమానంగా పంచాయి. విరాళాల వితరణ విషయంలో మరికొన్ని కంపెనీలు గత ఎన్నికలలో ఒక్కొక్క ప్రధాన పార్టీ సంపాదించిన వోట్లు లేదా సీట్ల శాతాన్ని బట్టి వారు విరాళాలు పంపిణీ చేశాయి.

కాంగ్రెస్ కు ప్రధానంగా ఆదిత్య బిర్లా గ్రూపు, టాటా గ్రూపుల నుంచి భారీగా విరాళాలు అందుతున్నాయి. భారతీయ జనతా పార్టీ (బిజెపి)కి అనిల్ అగర్వాల్ కు చెందిన స్టెర్లైట్ గ్రూప్, గుజరాత్ కేంద్రంగా గల అదానీ గ్రూపుల నుంచి గణనీయంగా విరాళాలు అందాయి. వీడియోకాన్ సంస్థ అధిపతులు ధూత్ కుటుంబ సభ్యులు కాంగ్రెస్ తోపాటు బిజెపికి, మహారాష్ట్రలో శివసేనకు విరాళాలు అందజేస్తున్నారు.

సమాచార హక్కు (ఆర్ టిఐ) చట్టాన్ని ఉపయోగించి 'డిఎన్ఎ' వార్తా సంస్థ 2003, 2007 మధ్య వివిధ రాజకీయ పార్టీలకు అందిన విరాళాల గురించిన అధికారిక గణాంకాలను సేకరించింది. ఈ విరాళాల వెల్లడి ఐచ్ఛికం అయినందున ఈ గణాంకాలు సూచనప్రాయమైనవే గాని వాస్తవాలను వెల్లడించేవి కాకపోవచ్చు. అందువల్ల మాయావతి నాయకత్వంలోని బహుజన్ సమాజ్ పార్టీ (బిఎస్ పి)కి సంబంధించిన వివరాలేవీ లేవు. బిఎస్ పి ఎన్నికల కమిషన్ కు ఏ గణాంకాలనూ సమర్పించలేదు.

ఈ గణాంకాల ప్రకటనలలో అంబానీ సోదరుల విరాళాల వివరాలు కూడా లేవు. ముఖేష్ అంబానీకి కాంగ్రెస్ లో అత్యున్నత స్థాయి నాయకులతో సంబంధాలు ఉండగా అనిల్ అంబానీకి సమాజ్ వాది పార్టీ (ఎస్ పి) నాయకుడు అమర్ సింగ్ తో సన్నిహిత సంబంధాలు ఉన్నాయి. 2003 - 2007 మధ్య వివిధ రాజకీయ పార్టీలకు అందిన విరాళాలలో సింహభాగం కాంగ్రెస్, బిజెపిలదే. ఈ రెండూ దాదాపు సమాన మొత్తాలను అందుకున్నాయి. కాంగ్రెస్ కు 52.42 కోట్లు, బిజెపికి 52.93 కోట్ల రూపాయలు పార్టీ ఫండ్ కింద అందాయి. భారత రాజకీయ వ్యవస్థలో ఈ రెండు ప్రధాన పార్టీలు అధికారంలో ఉన్నా లేకపోయినా వీటి ఆగ్రహానికి గురి కావడానికి ఏ బడా వాణిజ్య సంస్థా కోరుకోదు. కాని సంకీర్ణాలు కూడా ప్రాముఖ్యం సంతరించుకుంటున్నందున చిన్న పార్టీలు కూడా కొద్దో గొప్పో వాణిజ్య సంస్థల విరాళాలు అందుకుంటున్నాయి.

చిన్న పార్టీలకు పెద్ద మొత్తాలు
వాణిజ్య సంస్థల నుంచి విరాళాలు అందుకుంటున్న పార్టీలలో చిన్న చిన్న ప్రాంతీయ పార్టీలు కూడా ఉన్నాయి. ఈ విరాళాలు అందుకున్న ప్రాంతీయ పార్టీలలో శివసేన (రూ 4.17 కోట్లు), సమాజ్ వాది పార్టీ (రూ. 2.45 కోట్లు), తెలుగు దేశం పార్టీ (రూ. 2.25 కోట్లు), కేంద్ర ఆరోగ్య శాఖ మంత్రి డాక్టర్ అన్బుమణి రామదాస్ కు చెందిన పిఎంకె (రూ. 2.86 కోట్లు) చెప్పుకోదగినవి.

బడా దాత బిర్లా
కుమార మంగళం బిర్లా అధ్యక్షతన గల ఆదిత్య బిర్లా గ్రూప్ దేశంలో పెద్ద దాత సంస్థగా ఆవిర్భవించింది. ఈ గ్రూప్ రూ. 24.67 కోట్ల మేరకు విరాళాలు అందజేసింది. దీనిలో సింహభాగం రూ. 21.71 కోట్ల మేరకు కాంగ్రెస్ కు అందగా బిజెపికి రూ. 2.96 కోట్లు అందాయి. బిర్లా జనరల్ ఎలక్టొరల్ ట్రస్ట్ ఈ రెండింటికి మాత్రమే విరాళాలు అందజేసింది. బిజెపి రాజకీయ అవసరాల కోసం సిల్వాసాలో గల పబ్లిక్ అండ్ పొలిటికల్ అవేర్ నెస్ ట్రస్ట్ ప్రధానంగా నిధులు అందజేస్తున్నది. బిజెపి 2003, 2007 మధ్య ఈ ట్రస్ట్ నుంచి రూ. 9.5 కోట్లు అందుకున్నది. ఈ ట్రస్ట్ కు నిధులు ఎక్కువగా అనిల్ అగర్వాల్ కు చెందిన స్టెర్లైట్ గ్రూప్ నుంచి అందుతుంటాయి.

2000 సంవత్సరంలో ప్రభుత్వ రంగ సంస్థ బాల్కోలో 51 శాతం వాటాలను అప్పటి జాతీయ ప్రజాస్వామ్య కూటమి (ఎన్ డిఎ) ప్రభుత్వం స్టెర్లైట్ గ్రూపునకే విక్రయించింది. స్టెర్లైట్ ఇండస్ట్రీస్ కాంగ్రెస్ పార్టీకి కోటి రూపాయలను, బిజెపికి రూ. 50 లక్షలను విరాళంగా అందజేసింది. వేణుగోపాల్ ధూత్ సారథ్యంలోని వీడియోకాన్ వినిమయ వస్తువుల గ్రూప్ బిజెపి, కాంగ్రెస్, శివసేన పార్టీలకు రూ. 10 కోట్లకు పైగా విరాళాలు అందజేసింది. ఇందులో రూ. 4.5 కోట్లు కాంగ్రెస్ కు, రూ. 3.5 కోట్లు బిజెపికి అందగా శివసేనకు రూ. 2.63 కోట్లు సమకూరాయి. ధూత్ సోదరుడు రాజ్ కుమార్ శివసేన సౌజన్యంతో రాజ్యసభలో సభ్యుడుగా ఉన్నారు.

ఇక టాటా గ్రూపు రూ. 4.32 కోట్లను కాంగ్రెస్ కు, రూ. 2.67 కోట్లను బిజెపికి విరాళంగా అందజేసింది. ఈ గ్రూపు నుంచి శివసేనకు రూ. 60.94 లక్షలు, టిడిపికి రూ. 48.48 లక్షలు అందాయి. ఎలక్టొరల్ ట్రస్ట్ ద్వారా ఈ విరాళాలు అందజేశారు. పారదర్శకంగా రాజకీయ నిధులను సమకూర్చడాన్ని ప్రోత్సహించడం కోసం 1999 సార్వత్రిక ఎన్నికలకు ముందు ఈ ట్రస్ట్ ను ఏర్పాటు చేశారు.

సరకుల ట్రేడింగ్, వంటనూనెల వ్యాపారం, మౌళిక వసతుల కల్పన, ప్రైవేట్ రేవు కార్యకలాపాలు వంటి లావాదేవీలు నిర్వర్తించే గుజరాత్ కు చెందిన అదానీ గ్రూప్ బిజెపికి ఇతోధికంగా విరాళాలు ఇస్తున్నది. గుజరాత్ ముఖ్యమంత్రి నరేంద్ర మోడితో గౌతమ్ అదానీకి గల సాన్నిహిత్యం కారణంగా బిజెపికి రూ. 4 కోట్లు విరాళాలుగా అందాయి. కాంగ్రెస్ కు ఈ గ్రూపు నుంచి రూ. 20 లక్షలు విరాళాలు అందాయి. నరేంద్ర మోడి తరచు గౌతమ్ అదానీ ప్రైవేట్ విమానాలను తన పర్యటనలకు ఉపయోగిస్తుంటారు.

ఇక ప్రొఫెషనల్ తరహా మేనేజ్ మెంట్ గల ఇండియన్ టుబాకో కంపెనీ (ఐటిసి సంస్థ) ప్రతి పార్టీ పార్లమెంటరీ ప్రాతినిధ్యం ప్రాతిపదికగా విస్తృతంగా విరాళాలు అందజేస్తుంటుంది. ఈ సంస్థ రూ. 1.45 కోట్లను కాంగ్రెస్ కు, రూ. 1.38 కోట్లను బిజెపికి, రూ. 36 లక్షలను సమాజ్ వాది పార్టీకి, రూ. 12 లక్షలను శివసేనకు, రూ. 14.5 లక్షలను టిడిపికి, రూ. 8 లక్షలను జనతా దళ్ (యు)కు, రూ. 5 లక్షలను ఎఐఎడిఎంకెకు అందజేసింది. భారీ ఇంజనీరింగ్ సంస్థ లార్సెన్ అండ్ టూబ్రో (ఎల్ అండ్ టి) బిజెపికి రూ. 1.6 కోట్లు, కాంగ్రెస్ కు కోటి రూపాయలు, శివసేనకు రూ. 35 లక్షలు మేరకు విరాళాలు అందజేసింది. ఇక మహీంద్రా గ్రూపు కాంగ్రెస్, బిజెపి, శివసేన, టిడిపిలకు రూ 2.2 కోట్లను పంచింది. బజాజ్ గ్రూపు కాంగ్రెస్, బిజెపిలకు చెరొక కోటి రూపాయలు విరాళాలు ఇచ్చింది.

కాంగ్రెస్ టిక్కెట్ పై లోక్ సభకు ఎన్నికైన నవీన్ జిందాల్ ఆ పార్టీకి కోటి రూపాయలు విరాళంగా అందజేశారు. ఆయన కాంగ్రెస్ ప్రధాన ప్రత్యర్థి బిజెపికి కూడా రూ. 75 లక్షలు విరాళంగా అందజేశారు. దేశవ్యాప్తంగా విమానాశ్రయాల అభివృద్ధి ప్రాజెక్టులకు కాంట్రాక్టులు సంపాదించిన జిఎంఆర్ గ్రూపు బిజెపికి కోటి రూపాయలు, కాంగ్రెస్ కు రూ. 25 లక్షలను జిఎంఆర్ పవర్ కార్పొరేషన్, దాని ప్రమోటర్ల ద్వారా అందజేసింది. 2005 జూన్ లో విజయ్ మాల్యా పరమైన షావాలెస్ గ్రూప్ బిజెపికి 2004-05లో కోటి రూపాయలను విరాళంగా అందజేసింది.

పార్టీలకు విరాళాలు అందజేసిన వాణిజ్య సంస్థల జాబితాలో ఇంకా పెక్కు ప్రముఖ పేర్లు ఉన్నాయి. ఫార్మా సంస్థ రాన్ బాక్సీ కాంగ్రెస్ కు రూ. 65 లక్షలు, బిజెపికి రూ. 35 లక్షలు, టిడిపికి రూ. 5 లక్షలు వెరసి రూ. 95 లక్షలు విరాళాలు అందజేసింది. ఎల్ఎం థాపార్ గ్రూపు కాంగ్రెస్, బిజెపిలకు రూ. 70 లక్షల మేరకు విరాళాలు అందజేసింది. ఉమేష్ మోడి గ్రూపు బిజెపికి రూ. 50 లక్షలు, కాంగ్రెస్ కు రూ. 25 లక్షలు అందజేసింది.

అంత పేరు ప్రఖ్యాతులు లేని విరాళాల దాతలలో అకిక్ ఎడ్యుకేషన్ సెంటర్ కూడా ఉంది. ఢిల్లీ షాదారాలోని బలదేవ్ పార్క్ ప్రాంతంలో గల ఈ సంస్థ బిజెపికి కోటిన్నర రూపాయలు విరాళంగా అందజేసింది. సదరు అడ్రెస్ లో మూడంతస్తుల భవనం ఉంది. కాని డిఎన్ఎ వార్తా సంస్థ విలేకరికి అక్కడ ఏ విద్యా సంస్థా కనిపించలేదు. అహ్మదాబాద్ కు చెందిన నిమా స్పెసిఫిక్ ఫ్యామిలీ ట్రస్ట్ బిజెపికి కోటి రూపాయలు, కాంగ్రెస్ కు రూ. 30 లక్షల మేరకు విరాళాలు అందజేసింది.

చట్టం అంచున మాత్రమే పని చేస్తుండే రియల్ ఎస్టేట్ గ్రూపులు కూడా ప్రధాన పార్టీల విరాళాల దాత సంస్థలలో స్థానం సంపాదించాయి. మాల్స్, లగ్జరీ అపార్ట్ మెంట్లు నిర్మిస్తుండే, రాజ్ సింగ్ గెహ్లాట్ సారథ్యంలోని ఏంబియెన్స్ గ్రూపు తన గ్రీన్ పార్క్ ఎక్స్ టెన్షన్ ఆఫీసు నుంచి కాంగ్రెస్ కు రూ. 1.05 కోట్లు విరాళంగా అందజేసింది. ఢిల్లీకి చెందిన మరొక నిర్మాణ సంస్థ సోమదత్ బిల్డర్స్ బిజెపికి రూ. 75 లక్షలు విరాళంగా అందజేసింది.

ఇంజనీరింగ్, కన్ స్ట్రక్షన్, ప్రాజెక్ట్ మేనేజ్ మెంట్ సంస్థ పుంజ్ లాయిడ్ బిజెపికి కోటి రూపాయలు విరాళంగా అందజేసింది. రియల్ ఎస్టేట్ డెవలపర్ టుడే హౌస్ అండ్ ఇన్ ఫ్రాస్ట్రక్చర్స్ సంస్థ కాంగ్రెస్ కు రూ. 55 లక్షలను అందజేసింది. హైపర్, సూపర్ మార్కెట్ లను ఏర్పాటు చేస్తుండే జూబిలెంట్ గ్రూపు రూ. 50 లక్షలను, రియల్ ఎస్టేట్ సంస్థ క్రెడా రూ. 47 లక్షలను బిజెపికి అందజేశాయి. సంస్కృతి డెవలపర్స్ సంస్థ కాంగ్రెస్ కు రూ. 50 లక్షలు, శివసేనకు రూ. 15 లక్షలు విరాళంగా అందజేసింది. అంతగా పేరు ప్రఖ్యాతులు లేని ట్రస్ట్ ల నుంచి సుప్రసిద్ధ పారిశ్రామిక సంస్థల వరకు రాజకీయ పార్టీల చక్రాల కదలికకు చేయూత ఇచ్చాయన్నది ఈ జాబితా ద్వారా విదితమవుతున్నది.

ఫస్ట్ లిస్ట్ లోనే కళంకితులు!

2009-03-05T22:48:00.000-08:00

ఎం ఎచ్ అహెసన్ / హైదరాబాద్

మన రాజకీయాలు ఏవిధంగా నేరమయం అయ్యాయో చెప్పేందుకు ఇదిగో నిదర్శనం. రానున్న లోక్ సభ ఎన్నికల కోసం భారతీయ జనతా పార్టీ (బిజెపి), కాంగ్రెస్, సమాజ్ వాది పార్టీ (ఎస్ పి) విడుదల చేసిన అభ్యర్థుల తొలి జాబితాలలో నేర చరిత్ర ఉన్న అభ్యర్థుల పేర్లు కనీసం 18 చోటు చేసుకున్నాయని రాజకీయ జీవితంలో రుజువర్తనం కోసం పాటుపడే ఎన్ జిఒ 'నేషనల్ ఎలక్షన్ వాచ్' (ఎన్ఇడబ్ల్యు - న్యూ) వెల్లడించింది. వారిలో నలుగురు కాంగ్రెస్ కు, ఎనిమిది మంది బిజెపికి, ఆరుగురు ఎస్ పికి చెందినవారు. ఇది ప్రారంభం మాత్రమే. పార్టీల పూర్తి అభ్యర్థుల జాబితాలు ఇంకా వెలువడవలసి ఉంది కదా!

'కళంకిత' అభ్యర్థులలో ఎస్ పి అధ్యక్షుడు ములాయం సింగ్ యాదవ్, రాజకీయ నాయకుడుగా మారిన నటుడు, ప్రస్తుతం కాంగ్రెస్ పక్షాన ఉన్న రాజ్ బబ్బర్, బిజెపి నుంచి అనంత కుమార్, రమాకాంత్ యాదవ్, క్రికెటర్ నవజోత్ సింగ్ సిద్ధూ ఉన్నారు. క్రిమినల్ బెదరింపు నుంచి చంపుతాననే బెదరించడం, ప్రభుత్వోద్యోగులపై దౌర్జన్యం, అల్లర్లు లేవదీయడం వరకు వారిపై ఆరోపణలు నమోదై ఉన్నాయి. వాస్తవానికి సిద్ధూను ఒక హత్య కేసులో దోషిగా నిర్థారించారు. అయితే, అతనికి విధించిన శిక్షపై స్టే మంజురైంది.

మూడు పార్టీలు ఇంతవరకు ప్రకటించిన 169 మంది అభ్యర్థులలో 71 మంది దాఖలు చేసిన పూర్వ చరిత్రకు సంబందించిన అఫిడవిట్లను 'న్యూ' పరిశీలించింది. కాంగ్రెస్ 24 మంది, బిజెపి 92 మంది, ఎస్ పి 53 మంది అభ్యర్థుల పేర్లను ఇంతవరకు ప్రకటించాయి.

యుపిలోని మైన్ పురి నుంచి పోటీ చేస్తున్న ములాయం సింగ్ యాదవ్ పై గల కేసులలో క్రిమినల్ ఉల్లంఘన, కుట్ర నుంచి ఇతరుల పేరును చెడగొట్టేందుకు ఫోర్జరీ చేయడం వరకు కేసులు ఉన్నాయి. ములాయం ఆదాయానికి మించిన ఆస్తులు సంపాదించారనే ఆరోపణపై సిబిఐ దర్యాప్తు పెండింగ్ లో ఉన్న విషయం విదితమే.

రషీద్ మసూద్ (శహరాన్ పూర్), కున్వర్ రేవతీ రమణ్ సింగ్ (అలహాబాద్), బ్రిజ్ భూషణ శరణ్ సింగ్ (కైజర్ గంజ్), దీపక్ కుమార్ (ఉన్నావ్), అశోక్ కుమార్ సింగ్ చాందెల్ (హమీర్ పూర్) వంటి ఇతర ఎస్ పి అభ్యర్థులపై కూడా అల్లర్లు, చట్టవిరుద్ధంగా గుమిగూడడం, బెదరింపులకు పాల్పడడం వంటి కేసులు నమోదై ఉన్నాయి. కాంగ్రెస్ జాబితాలోని కళంకిత అభ్యర్థులలో రాజ్ బబ్బర్ (ఫతేపూర్ సిక్రీ) కాకుండా సురేంద్ర ప్రకాశ్ గోయెల్ (బన్స్ గావ్), జగదంబికా పాల్ (దొమారియాగంజ్), రత్నా సింగ్ (ప్రతాప్ గఢ్) కూడా ఉన్నారు. అల్లర్లు లేవదీశారనే అభియోగాలు బబ్బర్, గోయెల్ లపై నమోదయ్యాయి. బిజెపి కళంకితుల జాబితాలో ప్రహ్లాద్ జోషి (ధార్వాడ్), అనంతకుమార్ హెగ్డె (ఉత్తర కన్నడ), లల్లూ సింగ్ (అయోధ్య), సుభాష్ చంద్ర బర్మన్ (బేలూర్ ఘాట్), భాను ప్రతాప్ సింగ్ వర్మ (జల్గావ్) కూడా ఉన్నారు.

'నేర చరిత్ర కలిగి ఉన్న రాజకీయ నాయకుల సంఖ్య ఉత్తర ప్రదేశ్ లో ఎక్కువగా ఉంది. ఈ శక్తుల కారణంగా శాసనసభ, పార్లమెంట్ సరిగ్గా పని చేయలేకపోతున్నాయి. మనం నిష్కళంకులైన, సమర్థులైన అభ్యర్థులనే ఎన్నుకోవాలి' అని 'న్యూ' సమన్వయకర్త ఐ.సి. ద్వివేది సూచించారు.

వైయస్ శక్తిమాన్: సర్వే దుమారం

2009-03-05T22:46:00.000-08:00

న్యూస్ ఇండియా బ్యూరో

ఒక ప్రైవేట్ టీవీ చానెల్ సిఎన్ఎన్, ఐబిఎన్, సిఎస్ డిఎస్ నిర్వహించి వెల్లడించిన సర్వే ఫలితాలు ఆంధ్రప్రదేశ్ రాష్ట్రంలో సంచలనానికి కారణమైంది. కాంగ్రెస్ శిబిరంలో ఉత్సాహం ఉట్టిపడుతుండగా ప్రతిపక్షాలు రుసరుసలాడుతున్నాయి. కాంగ్రెసుకు అంత సీన్ లేదని తెలుగుదేశం తదితర ప్రతిపక్షాలు కొట్టిపారేస్తున్నాయి. ప్రజారాజ్యం పార్టీ నేతలైతే ఆ సర్వేను పట్టించుకోవాల్సిన అవసరం లేదని అంటున్నారు. తమ సర్వే ప్రకారం తమకు 200 సీట్లు వస్తాయని ప్రజారాజ్యం పార్టీ అధికార ప్రతినిధి పరకాల ప్రభాకర్ అంటున్నారు.

ఇంతకీ సర్వే ఏం తేల్చింది. ముఖ్యమంత్రి డాక్టర్ వైయస్ రాజశేఖర రెడ్డి చాలా బలంగా ఉన్నారని తేల్చి చెప్పింది. కాంగ్రెసుకు 45 శాతం ప్రజల మద్దతు ఉందని ఆ సర్వే చెప్పింది. ఈ మేరకు ప్రజల మద్దతు ఉంటే కాంగ్రెసు పార్టీ అధికారంలోకి రావడాన్ని ఏ శక్తి కూడా ఆపలేదనేది నిజం. తెలుగుదేశం పార్టీకి 30 శాతం మద్దతు ఉన్నట్లు తెలిపింది. బిజెపి మాత్రం కొంత సంతోషంగా ఉంది. బిజెపికి 9 శాతం ఓటర్ల మద్దతు ఉందని తెలపడమే అందుకు కారణం. అంటే రాష్ట్రంలో బిజెపి బలం పెరిగినట్లు.

ప్రజారాజ్యం పార్టీకి 7 శాతం ఓటర్ల మద్దతు మాత్రమే ఉందట. ఇది బిజెపికి ఉన్న మద్దతు కన్నా తక్కువ. అయితే కొత్త పార్టీ కావడంతో ప్రజారాజ్యం మద్దతు విస్తృతి పెరగవచ్చునని సర్వే తెలిపింది. వామపక్షాలకు 2 శాతం, ఇతరులకు 7 శాతం మద్దతు లభిస్తున్నట్లు సర్వే తేల్చింది. ఇతరులెవరనేది తేల్చ లేదు. బహుశా తెలంగాణ రాష్ట్ర సమితి, నవ తెలంగాణ పార్టీ, మన పార్టీ కావచ్చు.

ఆంధ్రప్రదేశ్ సర్వేకు వచ్చేసరికి సిఎన్ఎన్ ఒక కొలికి పెట్టింది. ఆంధ్రప్రదేశ్ సాంపిల్ సైజును తక్కువగా తీసుకున్నామని, అందువల్ల 3 శాతం మార్జీన్ ఎర్రర్ ఉండవచ్చునని చెప్పింది. ఇది ఒక రకంగా తప్పించుకునే ప్రయత్నమా, కావచ్చు. ఒక తెలుగు దిన పత్రిక ప్రతినిధి రాజగోపాలన్ సర్వే ప్యానెల్ చర్చలో పాల్గొంటూ రాజశేఖర రెడ్డిని ఆంధ్రప్రదేశ్ నరేంద్ర మోడీగా అభివర్ణించారు. ఈసారి ప్రభుత్వ వ్యతిరేకత పెద్దగా లేదని, కానీ గత మూడు నెలలుగా అది పెరుగుతోందని నాగేశ్వర్ అనే నిపుణుడు అన్నారు. ఇందులో వాస్తవం ఉంది. ఎన్నికలు సమీపించేనాటికి అది మరింత పెరగవచ్చు.

రాష్ట్రం మొత్తాన్ని పరిగణనలోకి తీసుకుంటే 27 శాతం మంది తెలంగాణ రాష్ట్ర ఏర్పాటుకు అనుకూలంగా ఉన్నట్లు, 52 శాతం మంది వ్యతిరేకంగా ఉన్నట్లు తేల్చిచెప్పింది. తెలంగాణ ప్రాంతంలోని ప్రజలు 63 శాతం మంది రాష్ట్ర ఏర్పాటును కోరుకుంటున్నట్లు సర్వేలో తెలింది. తెలుగుదేశం, తెలంగాణ రాష్ట్ర సమితి, వామపక్షాలకు మధ్య పొత్తు కుదిరిన నేపథ్యంలో ఈ ప్రాంతంలో కాంగ్రెసు గణనీయంగా బలహీనపడే అవకాశాలున్నట్లు సర్వేను బట్టే తెలుస్తోంది. తెలంగాణలోనే ఎక్కువ అసెంబ్లీ స్థానాలు ఉన్నాయి. ఈ ప్రాంతంలో గెలుచుకునే సీట్లను బట్టే రాష్ట్రంలో అధికారంలోకి రావడం, రాకపోవడం అనేది నిర్ణయమవుతుంది. ఉప ఎన్నికలు కూడా ఇదే విషయాన్ని తెలియజేస్తున్నాయి.

తెలంగాణలో చంద్రబాబు, మిగతా ప్రాంతాల్లో రాజశేఖర రెడ్డి తమ బలాలను చాటుకుంటారని ప్యానెలిస్టులు చివరగా తేల్చారు. కానీ పరిస్థితి అలా ఉండకపోవచ్చు. ప్రజారాజ్యం పార్టీ బలం సర్వేలో కన్నా ఎక్కువ ఉండే అవకాశం ఉంది. తెలంగాణలో తెలుగుదేశం పార్టీ నాయకత్వంలోని మహా కూటమి తన బలాన్ని చాటుకుంటే, మిగతా ప్రాంతాల్లో కాంగ్రెసు, ప్రజారాజ్యం, తెలుగుదేశం పార్టీలు సీట్లను పంచుకునే అవకాశం ఉంటుంది. ఈ తెలంగాణేతర ప్రాంతాల్లో వస్తే కాంగ్రెసుకు మిగతా రెండు పార్టీల కన్నా ఎక్కువ సీట్లు రావచ్చు. అంత మాత్రాన సర్వే ప్రకారం తిరుగులేని శక్తిగా రాజశేఖర రెడ్డి ముందుకు వస్తారని చెప్పడం సరి కాకపోవచ్చు.

చిత్తశుద్ధి లేకే తెలంగాణ రాలేదు: చిరంజీవి

2009-03-05T22:42:00.000-08:00

న్యూస్ ఇండియా బ్యూరో

నేతల్లో చిత్తశుద్ధి లేకపోవడం వల్లే ప్రత్యేక తెలంగాణ రాలేదని ప్రజారాజ్యం అధినేత చిరంజీవి పేర్కొన్నారు. ప్రత్యేక రాష్ట్రం అంటే సౌలభ్యం కోసం అన్నదమ్ములు విడిపోవడంలాంటిదేనని ఈ సందర్భంగా చిరంజీవి పేర్కొన్నారు.

హైదరాబాద్‌లోని ప్రజారాజ్యం కార్యాలయంలో జరిగిన ఓ కార్యక్రమం సందర్భంగా చిరంజీవి మాట్లాడుతూ చిరంజీవి పై వ్యాఖ్యలు చేశారు. ప్రత్యేక తెలంగాణ అంశంలో ఆంధ్రలో ఎలాంటి వ్యతిరేకతా లేదని చిరంజీవి పేర్కొన్నారు. ప్రత్యేక తెలంగాణ అంశంలో ప్రజారాజ్యంకు చిత్తశుద్ధి ఉంది కాబట్టే తెలంగాణకు చెందిన దేవేందర్‌గౌడ్, పెద్దిరెడ్డిలు తమ పార్టీలో కలిశారని ఆయన పేర్కొన్నారు. ఈ సందర్భంగా మార్చి 10న జరగనున్న సామాజిక న్యాయ శంఖారావం పోస్టరును చిరంజీవి విడుదల చేశారు.

ఈ కార్యక్రమంలో భాగంగా మెదక్ జిల్లా టీడీపీకి చెందిన భట్టి జగపతి ప్రజారాజ్యం పార్టీలో చేరారు. ఈ సందర్భంగా జగపతి మాట్లాడుతూ చిరంజీవి ప్రతిపాదించిన సామాజిక న్యాయం నచ్చి ప్రజారాజ్యంలో చేరినట్టు పేర్కొన్నారు. అలాగే తూర్పుగోదావరి జిల్లాకు చెందిన మాజీ మంత్రి మెట్ల సత్యనారాయణ కూడా గురువారం ప్రజారాజ్యం పార్టీ తీర్థం పుచ్చుకున్నారు.

ఈ సందర్భంగా ఆయన మాట్లాడుతూ చిరంజీవి నటించిన ఆపద్భాందవుడు చిత్రంలో తాను ఆయనకు తండ్రిగా నటించానని పార్టీలోనూ అలాంటి పాత్రే పోషిస్తానని పేర్కొన్నారు.

గాంధీ వస్తువులు సొంతం చేసుకున్న మాల్యా

2009-03-05T22:41:00.000-08:00

న్యూస్ ఇండియా బ్యూరో

అనేక ఆసక్తికర మలుపుల తర్వాత గాంధీ వస్తువులు మళ్లీ భారత్ చేరే అవకాశం లభించింది. అమెరికాలో గురువారం జరిగిన వేలంలో పాల్గొన్న విజయ్ మాల్యా 1.8 బిలియన్ అమెరికన్ డాలర్లకు గాంధీ వస్తువులను సొంతం చేసుకున్నారు. దీంతో మార్గం ఏదైనా గాంధీ వస్తువులు మళ్లీ భారత్ చేరే అవకాశం లభించింది.

అదేసమయంలో రెండు వారాల తర్వాత మాత్రమే గాంధీ వస్తువులు మాల్యా చేతికి చేరనున్నాయి. ఈ వేలంపై ఎవరికైనా అభ్యంతరాలుంటే వాటిని నివృతి చేసేందుకై గాంధీ వస్తువులను వేలం సంస్థ రెండు వారాల వరకు తమ దగ్గరే పెట్టుకోనుంది. ఈ విషయమై మాల్యా తరపున వేలంలో పాల్గొన్న టోనీ బెడి మాట్లాడుతూ వేలం ద్వారా వస్తువులను చేజిక్కించుకోవడం ఆనందంగా ఉందని అన్నారు. వేలంలో తాము వేసిన బిడ్ దేశం తరపున వేసినదని అందుకే గాంధీ వస్తువులు మళ్లీ భారత్‌కే చేరుతున్నాయని అన్నారు.

గాంధీ ఆనాడు ఉపయోగించిన కళ్ల జోడు, ఒక జత చెప్పులు, వాచీ, తినే పళ్లెం, చెంబులను సేకరించిన అమెరికాకు చెందిన జేమ్స్ ఓటిస్ వీటిని వేలం వేయడానికి నిర్ణయించిన సంగతి తెలిసిందే. అయితే గాంధీ వస్తువులను వేలం వేయడం సరికాదంటూ చాలామంది అభిప్రాయపడ్డారు. దీంతో భారత ప్రభుత్వం గాంధీ వస్తువులను వెనక్కి తెప్పించేందుకు ఓటీస్‌తో చర్చలు ప్రారంభించింది.

ఈ సందర్భంగా ఓటిస్ భారత ప్రభుత్వానికి కొన్ని షరత్తులు పెట్టారు. ఈ షరత్తులకు భారత ప్రభుత్వం ఒప్పుకోకముందే వేలం నిర్వహించడం జరిగింది. అయితే ఈ వేలంలో పాల్గొన్న భారతీయ వ్యాపారవేత్త విజయ్‌మాల్యా గాంధీ వస్తువులను దక్కించుకోవడంతో ఈ కథ సుఖాంతమైనట్టైంది.

ఒక్కో కుటుంబానికి ఉచిత కలర్ టీవి: తెదేపా

2009-03-05T02:16:00.001-08:00

న్యూస్ ఇండియా బ్యూరో

వచ్చే అసెంబ్లీ ఎన్నికల్లో తమ పార్టీ అధికారంలోకి వస్తే ప్రతి కుటుంబానిక కలర్ టీవీని అందజేస్తామని తెలుదేశం పార్టీ అధ్యక్షుడు నారా చంద్రబాబు నాయుడు ప్రకటించారు. అలాగే.. పేదలకు మెరుగైన వైద్య సేవలు అందించేందుకు సమగ్ర ఆరోగ్య పథాకాన్ని అమలు చేస్తామని తెలిపారు. ఈ పథకంలో భాగంగా జ్వరం నుంచి గుండె జబ్బులకు ఉచిత వైద్య సహాయం అందిస్తామని వెల్లడించారు.

తెదేపా మేనిఫెస్టోలో పేర్కొన్న అంశాలను ఆయన గురువారం మీడియా సమావేశంలో వెల్లడించారు. ఈ మేనిఫెస్టోలో ఇంకా, పేద, మధ్య తరగతి కుటుంబాలకు చెందిన మహిళల పేరిట బ్యాంకు ఖాతా తెరిచి నెలకు ప్రతి ఒక్కరికీ రూ.1500 చోప్పున నగదు చెల్లిస్తామని చెప్పారు. అలాగే, నిరు పేదలకు నెలకు రూ.2000, పేదలకు రూ.1500, మధ్య తరగతి కుటుంబానికి రూ.1000 చొప్పున ఆర్థిక సాయం అందించే విషయాన్ని పరిశీలిస్తున్నట్టు చెప్పారు.

అలాగే, రాష్ట్రంలో కుప్పలు తెప్పలుగా వెన్న బెల్టు షాపులను పూర్తిగా ఎత్తివేస్తామని చెప్పారు. రాష్ట్ర ఆదాయం పెరుగుతోందని, అలాగే, రాష్ట్రంలోని పేద ప్రజల తలసరి ఆదాయం పెంచేందుకు అవసరమైన చర్యలు తీసుకుంటామన్నారు.

భారత ఎన్నికలపై యావత్ ప్రపంచ దృష్టి

2009-03-05T02:15:00.000-08:00

న్యూస్ ఇండియా బ్యూరో

భారత పార్లమెంటుకు ఏప్రిల్‌లో జరగనున్న సార్వత్రిక ఎన్నికలు ఇప్పుడు ప్రపంచ దేశాల దృష్టిని ఆకర్షిస్తున్నాయి. ఈ ఎన్నికలను ఇక్కడి ప్రభుత్వం, ప్రజలు ఎలా జరుపుతారనేదానిపై ప్రత్యక్షంగా పరిశీలించేందుకు కొన్ని దేశాలు తమ బృందాల్ని పంపించేందుకు సన్నాహాలు చేస్తున్నాయి.

బ్రిటన్‌లో అలాంటి ప్రయత్నమే జరుగుతోంది. భారతదేశంలో ఎన్నికల కార్యకలాపాలు ఏ విధంగా ఉంటాయో తెలుసుకోవాలని, తమను ఆ దేశం తీసుకెళ్లమని వివిధ వర్గాలకు చెందిన దాదాపు 40 మంది బ్రిటన్‌ కేంద్రంగా పనిచేస్తున్న సఫ్రాన్‌ ఛేజ్ అనే ప్రజా సంబంధాల సంస్థను కోరారు. దీంత ఆ సంస్థ గత వారం ఒక సమావేశం ఏర్పాటు చేసి అందుకు సంబంధించి కొన్ని అంశాలను వివరించింది.

ఇలావుండగా మరికొన్ని దేశాల ప్రజలు ఆయా దేశాధినేతలకు తమ కోరికను వెలిబుచ్చారు. దీనిపై పలు దేశాలు స్పందిస్తూ భారత దేశానికి వారిని పంపడానికి ప్రయత్నాలను ముమ్మరం చేశాయి.

మూడేళ్ళలో పది లక్షల ఉద్యోగాలు: పీఆర్పీ

2009-03-05T02:13:00.001-08:00

న్యూస్ ఇండియా బ్యూరో

ప్రజారాజ్యం అధికారంలోకి వస్తే తొలి మూడేళ్ళలో పది లక్షల మందికి ప్రభుత్వ ఉద్యోగాలు కల్పిస్తామని ప్రజారాజ్యం ప్రకటించింది. ఎన్నికల మేనిఫెస్టో ముసాయిదాను ఆ పార్టీ ఎన్నికల కమిటీ ఛైర్మన్ పర్వతనేని ఉపేంద్ర గురువారం హైదరాబాద్‌లో విడుదల చేశారు. సామాజిక న్యాయానికి పెద్ద పీట వేస్తామన్నారు. పేదలు, ధనవంతుల మధ్య అంతరాలు తగ్గిస్తామన్నారు.

రైతులకు రోజుకు పది గంటల పాటు ఉచిత విద్యుత్ ఇస్తామని పేర్కొంది. రైతులందరికీ పెన్షన్‌, బీమా పథకాలు ప్రవేశపెడతామని తెలిపారు. నాణ్యమైన విద్యుత్‌ను అందరికీ అందిస్తామని అన్నారు. ప్రతిభకు పెద్దపీట వేసి, ప్రోత్సాహిస్తామన్నారు. వంద రూపాయలకే వంట సరకులు అందజేస్తామన్నారు. రాష్ట్రంలో దశలవారీగా మద్యనిషేధాన్ని అమలు చేస్తామని చెప్పారు.

ఆడపిల్లలకు పసుపు కుంకుమ పథకాన్ని అమలు చేస్తామన్నారు. చేనేత కార్మికుల కోసం ప్రత్యేక బోర్డును ఏర్పాటుచేస్తామని కూడా తెలిపారు. చదువుకున్న వికలాంగ విద్యార్థులకు ప్రభుత్వ ఉపాధి కల్పిస్తామని చెప్పారు. ఐటీ కంపెనీలకు అసంబద్ధంగా ధారాదత్తం చేసిన భూములను రద్దు చేస్తామన్నారు.

నిరుద్యోగ యువతకు ఉద్యోగం వచ్చే వరకు నెలకు రూ.వెయ్యి చొప్పున ఆర్థిక సాయం అందజేస్తామని తెలిపారు. భూములు లేని పేదలకు రెండు ఎకరాల మాగాణి లేదా ఐదు ఎకరాల మెట్టను అందజేస్తామన్నారు. కాగా, ఈ ముసాయిదాను ప్రజల మధ్య చర్చకు పెట్టామని, అవసరమైతే మార్పులు చేర్పులు చేసి, తుది మేనిఫెస్టోలో చేర్చుతామన్నారు.

ఆళ్లగడ్డలో "రాజ్యం" - ఆలూరులో "దేశం"

2009-03-04T02:07:00.000-08:00

ఎం ఎచ్ అహెసన్ / హైదరాబాద్

అత్యంత ఉత్కంఠభరితంగా సాగిన జడ్‌పిటిసి, ఎంపిటిసి ఉపఎన్నిక ఫలితాలు రాజకీయపక్షాలకు మిశ్రమ సంకేతాలనిచ్చాయి. జడ్‌పిటిసి స్థానాల్లో ప్రజారాజ్యం, తెలుగుదేశం పార్టీలకు అవకాశం ఇచ్చిన ఓటర్లు, మెజారిటీ ఎంపిటిసి స్థానాలను కాంగ్రెస్‌ పార్టీకి కట్టబెట్టారు. మొత్తం మీద వచ్చే ఎన్నికల్లో తమ వైఖరి ఎలా ఉండబోతోందో స్పష్టం చేసే ప్రయత్నం చేశారు. ఫలితాలు ఊహించినట్లుగానే ఉన్నా కాంగ్రెస్‌ పార్టీకి ఓటర్లు హెచ్చరికలు జారీ చేశారు.

ఇక కర్నూలు జిల్లా ఆలూరులో విజయాన్ని కట్టబెట్టిన ఓటర్లు ఆళ్లగడ్డలో డిపాజిట్‌ కూడా ఇవ్వకుండా తెలుగుదేశం పార్టీకి షాక్‌నిచ్చారు. మరోవైపు ఆళ్ళగడ్డలో స్వతంత్ర అభ్యర్థికి మద్దతు ప్రకటించిన ప్రజారాజ్యం పార్టీని విజయం వరించినా అది భూమా దంపతుల వ్యక్తిగత విజయంగానే భావిస్తున్నారు. ఆళ్ళగడ్డలో మాదిరిగానే ప్రరాపా ఆలూరులోనూ తన అభ్యర్థిని బరిలోకి దించి ఉంటే ఓటర్ల తీర్పు ఎలా ఉండేదో తేటతెల్లమయ్యేదని స్థానిక నేతల అభిప్రాయం.

జిల్లాలోనే కాదు రాష్ట వ్యాప్తంగా అందరి దృష్టిని ఆకర్శించిన ఆళ్ళగడ్డ జడ్‌పిటిసి ఎన్నికల్లో స్వతంత్ర అభ్యర్థిని బరిలోకి దించిన ప్రజారాజ్యం పార్టీ భారీ విజయాన్ని తన ఖాతాలో వేసుకోవడం భవిష్యత్ శుభసూచకం. కాంగ్రెస్‌ అభ్యర్థిపై ఐదు వేల పైచిలుకు మెజారిటీని సాధించిన పిఆర్‌పి తెలుగుదేశం అభ్యర్థికి ధరావత్తు కూడా దక్కకుండా చేసింది.

ప్రజారాజ్యం పార్టీ బలపరిచిన మాదం రవికి 18,275 ఓట్లు రాగా, కాంగ్రెస్‌పార్టీ అభ్యర్థి చెన్నయ్యకు 13,072 ఓట్లు, తెలుగుదేశంపార్టీ అభ్యర్థి కమలమ్మకు 4,635 ఓట్లు వచ్చాయి. ఆళ్ళగడ్డలో 58,643 ఓటర్లు ఉండగా, 37,340 ఓట్లు పోలయ్యాయి. వ్యక్తి ప్రాధాన్యత ఉన్న ఆళ్ళగడ్డ రాజకీయాల్లో జడ్‌పిటిసి స్థానానికి జరిగిన ఉప ఎన్నిక ఆయా అభ్యర్థుల కంటే భూమా-గంగుల-ఇరిగెల మధ్యే సాగిందనడం అక్షరసత్యం.

జడ్‌పిటిసి ఉపఎన్నికకు ఇంత ప్రాధాన్యత రావడానికి వీరి ప్రతిష్టే కారణమైంది. భూమా రాజీనామాతో ఇబ్బందుల్లో పడ్డ తెలుగుదేశం పార్టీ ఇరిగెల రూపంలో ఆ లోటును భర్తీ చేసుకునేందుకు చేసిన ప్రయత్నం ఫలించలేదు. తెదేపా ఆళ్ళగడ్డ బరిలో నిలబడేందుకు మరింత పోరాటం చేయాల్సిందేనని ఈ ఫలితం స్పష్టం చేసింది. కాంగ్రెస్‌ పార్టీ రెండవ స్థానం దక్కించుకుని పరువును నిలబెట్టుకోగా, తెలుగుదేశం పార్టీ మాత్రం కష్టాల్లో పడింది.

ఇక ఆలూరు జడ్‌పిటిసి ఉపఎన్నిక ఫలితం కాంగ్రెస్‌ పార్టీకి తీవ్రమైన షాక్‌నిచ్చేదే. ఈ స్థానంలో తెదేపా అభ్యర్థి మేకల భాస్కర్‌కు 10,789 ఓట్లు రాగా, కాంగ్రెస్‌ అభ్యర్థి, మాజీ ఎమ్మెల్యే లోకనాథ్‌కు 9,320 ఓట్లు వచ్చాయి. ఇక్కడ తెలుగుదేశం పార్టీని విజయం వరించడం ఖాయమని ముందుగానే తేలింది. అయినా ఓటర్లను ఆకర్షించడంలో కాంగ్రెస్ విఫలమైంది. వైఎస్సార్‌ మంత్రివర్గంలో జిల్లా నుండి ప్రాతినిధ్యం వహిస్తున్న ఏకైక మంత్రి మారెప్ప సొంత నియోజకవర్గంలో ఈ ఓటమి ఆయనకు చేదు అనుభవాన్ని మిగిల్చింది.

ఉపఎన్నికల ఫలితం రాబోయే ఎన్నికల ఫలితాలపై ప్రభావం చూపించే అవకాశం ఉన్నా వైఎస్సార్ ఆదేశించే వరకు మారెప్ప ఆ నియోజకవర్గంపై దృష్టి సారించకపోవడం ఓటమికి కారణమైందని కాంగ్రెస్‌ శ్రేణులు భావిస్తున్నాయి. ఇక చివరిక్షణంలో కాంగ్రెస్‌ పార్టీ అధిష్టానం ముఖ్యమైన నేతలందరినీ ఆలూరు వైపుకు మళ్లించినా ప్రజల్లో ఉన్న వ్యతిరేకత ముందు అది బలాదూర్‌ అయ్యింది.

ఈ ఉపఎన్నికల్లో కాంగ్రెస్‌పార్టీకి ఎంపిటిసి స్థానాల్లో మెజారిటీ స్థానాలు దక్కడం ఒక్కటే ఊరట కలిగించే అంశం. మొత్తం ఆరు స్థానాలకు ఉపఎన్నికలు జరిగితే అవుకు మండలం జూనూతల కాంగ్రెస్‌ పక్షాన ఏకగ్రీవంగా పూర్తయింది. మిగిలిన మండగిరి-2, నేమకల్లు-2, మాయలూరు, దొడ్డిమేకల, హోళగుంద-2 స్థానాల్లో దొడ్డిమేకల మినహా మిగిలినవన్నీ కాంగ్రెస్‌ ఖాతాలో చేరిపోయాయి.

మరో నాలుగు నెలల్లో జరగాల్సిన అసెంబ్లీ, లోక్‌సభ ఎన్నికలకు ఈ ఉపఎన్నికలు రెఫరెండంగా భావించినా.. భావించకపోయినా ఓటమికి గురైన మిగిలిన పక్షాలు తమ తీరును మరోసారి పునఃసమీక్షించుకోవలసిన అవసరం ఎంతైనా ఉందని నొక్కి చెప్పాయన్నది మాత్రం సత్యం.

అమలుకు వచ్చిన ఎన్నికల నిబంధలు ఇవే...

2009-03-04T02:01:00.000-08:00

ఎం ఎచ్ అహెసన్ / హైదరాబాద్

సార్వత్రిక, అసెంబ్లీ ఎన్నికల షెడ్యూల్‌ను కేంద్ర ఎన్నికల సంఘం ప్రకటించడంతో రాష్ట్రంలో ఎన్నికల వేడి ఊపందుకుంది. దీనికి తోడు ఎన్నికల నిబంధనలు తక్షణం అమలుకు వచ్చింది. ఈ నిబంధనలను ఉల్లంఘించే వారిపై కఠిన చర్యలు తీసుకుంటామని రాష్ట్ర ఎన్నికల ప్రధానాధికారి ఐవీ.సుబ్బారావు హెచ్చరించారు. ఎన్నికల నిబంధనలు పరిశీలిస్తే..

* రాత్రి పది గంటలు దాటిన తర్వాత ఎలాంటి లౌడు స్పీకర్లను ఉపయోగించకూడదు.
* ప్రభుత్వ, ప్రైవేట్ సంస్థలకు చెందిన గోడలపై ముందస్తు అనుమతి లేకుండా రాతలు రాయకూడదు. ఒక వేళ రాతలు రాసినా, పోస్టర్లు అంటించినా కేసులు నమోదు చేస్తారు.
* నిషిద్ధ ప్రదేశాల వద్ద సభలు, సమావేశాలు నిర్వహించరాదు.

* వ్యక్తిగత స్వేచ్ఛకు భంగం కలిగించే విధంగా ఇళ్ళ ముందు ప్రదర్శనలు, పికెటింగ్‌లు నిర్వహించరాదు.
* రోడ్ల నిర్మాణాలు, తాగునీటికి సంబంధించిన హామీలు, వాగ్ధానాలు, గ్రాంట్లు మంత్రులు ఇవ్వరాదు.
* ప్రభుత్వం ఎలాంటి తాత్కాలిక నియామకాలను చేపట్టరాదు.
* మంత్రులు వారి అధికార వాహనాలను ఇంటి నుంచి సచివాలయం వరకే వినియోగించాలి.

* ఎన్నికల సిబ్బందిని మంత్రులు తమ వద్దకు పిలిపించి, వివిధ అంశాలపై చర్చించరాదు.
* ప్రభుత్వం కొత్త పథకాలు, ప్రకటనలు చేయరాదు. ప్రస్తుతం అమలవుతున్న పథకాల గురించి కూడా ప్రచారం చేయరాదు.
* వ్యక్తిగత అంశాలకు సంబంధించిన అంశాలను ప్రచారంలో చొప్పించరాదు.
* ప్రార్థనా ప్రదేశాలలో ఎన్నికల ప్రచారం చేయరాదు.
* ఒక పార్టీ పోస్టర్లను మరొక పార్టీ తొలగించరాదు.

* సభలు, సమావేశాలు నిర్వహించే ముందు స్థానిక పోలీసుల అనుమతి తప్పనిసరి.
* రాజకీయ నాయకులు సమావేశాలు, బహిరంగ సభలలో గౌరవప్రదంగా, హుందాగా నడుచుకోవాలి.
* ఎన్నికల నిబంధనలు ఉల్లంఘిస్తే ప్రజలు కూడా ఫిర్యాదు చేసే అవకాశం. దీనికోసం రాపిడ్‌ రెస్పాన్స్‌ సిస్టంను ఏర్పాటు చేశారు. టోల్‌ ఫ్రీ నంబరు 1100ను కేటాయించారు. ఎవరైనా ఈ నంబరుకు డయల్‌ చేసి ఫిర్యాదులిస్తే ఆయా జిల్లాల కలెక్టర్లు, ఎస్పీలు వెంటనే స్పందించి చర్య తీసుకుంటారు.

* ముఖ్యమంత్రి వైఎస్‌.రాజశేఖరరెడ్డి అధికారికంగా హెలికాప్టర్‌ను వినియోగించరాదు. అభ్యర్థుల కాన్వాయ్‌లో మూడు వాహనాలకు మించి వినియోగించరాదు. ఎక్కువ వాహనాలు కలిగి ఉంటే వాటిని అభ్యర్థి ఖాతాలో ఎన్నికల ఖర్చు కిందకు జమ చేస్తారు.
* కులాలు, మతాలు జాతుల మధ్య వివాదాలు రగిల్చే విధంగా ప్రసంగాలు చేయరాదు.

కాంగ్రెస్ ఎన్నికల ప్రచారంలో జయహో గీతం

2009-03-04T01:59:00.000-08:00

ఎం ఎచ్ అహెసన్ / హైదరాబాద్

ప్రముఖ సంగీత దర్శకుడు ఏఆర్ రెహమాన్‌కు ఆస్కార్ అవార్డు సాధించిపెట్టిన "జయహో" గీతాన్ని వచ్చే లోక్‌సభ ఎన్నికల ప్రచారంలో ఉపయోగించాలని కాంగ్రెస్ పార్టీ నిర్ణయించింది. స్లమ్‌డాగ్ మిలియనీర్ చిత్రం కోసం ఏఆర్ రెహమాన్ ఈ గీతాన్ని స్వరపరిచిన సంగతి తెలిసిందే. ఈ గీతం ఇటీవల రెహమాన్‌కు ప్రతిష్టాత్మక ఆస్కార్ అవార్డును అందించింది.

తాజాగా దీనిని ఎన్నికల ప్రచారానికి ఉపయోగించుకోవాలని కాంగ్రెస్ పార్టీ నిర్ణయించింది. తమ పాలన సామాన్యుడి కోసం సాగిందనే సందేశాన్ని కాంగ్రెస్ పార్టీ ఈ గీతం ద్వారా ప్రజల్లోకి తీసుకెళ్లాలనుకుంటోంది. "జయహో" పాట హక్కులను టీ - సిరీస్ సంస్థ నుంచి కొనుగోలు చేసినట్లు కాంగ్రెస్ సీనియర్ నేత ఒకరు బుధవారం వెల్లడించారు.

ఇదిలా ఉంటే బాలీవుడ్ సూపర్‌స్టార్ షారుఖ్ ఖాన్ నటించిన చక్‌దే చిత్రంలోని టైటిల్ సాంగ్‌ను గతంలో కాంగ్రెస్ పార్టీ ఉపయోగించుకుంది. గత ఏడాది జరిగిన గుజరాత్ అసెంబ్లీ ఎన్నికల ప్రచారంలో కాంగ్రెస్ పార్టీ చక్‌దే పాటను ఉపయోగించింది. ఇప్పుడు లోక్‌సభ ఎన్నికల్లో తమ ప్రభుత్వం సామాన్యుడి కోసమనే సందేశాన్ని తెలిపేందుకు "జయహో"ను సిద్ధం చేస్తోంది.

'కమలం'తో చిరంజీవి 'చెలిమి'!?

2009-03-03T23:31:00.000-08:00

ఎం ఎచ్ అహెసన్ / హైదరాబాద్

ప్రజారాజ్యం కీలక నిర్ణయం తీసుకోనుంది. ఎన్నికల గుర్తును మరో పార్టీ నుంచి అరువు తెచ్చుకునేందుకు సన్నాహాలు చేస్తోంది. తమకు సొంతగా ఉమ్మడి గుర్తు కోసం చివరి నిమిషం వరకు న్యాయ పోరాటం చేయాలని, తమ కృషి ఫలించని పక్షంలో కమలంతో చెలిమి చేయాలని భావిస్తోంది. ఇందుకోసం ఇటీవల పార్టీలో చేరిన రాజకీయ సీనియర్ నేత తూళ్ళ దేవేందర్ గౌడ్‌తో రహస్య మంతనాలు జరిపించినట్టు సమాచారం.

న్యూఢిల్లీకి వెళ్లిన గౌడ్, భాజపా ప్రధాన కార్యాలయానికి వెళ్లి రాష్ట్ర వ్యవహారాల ఇన్‌ఛార్జ్ ప్రకాష్ జావ్‌దేకర్‌తో మంతనాలు జరిపినట్టు సమాచారం. తమ చెలిమి ఫలించేందుకు పీఆర్పీ ప్రధాన కార్యదర్శి, చిరంజీవి బావమరిది అల్లు అరవింద్‌ను రంగంలోకి దించాలని వారిరువురు ఒక నిర్ణయానికి వచ్చినట్టు సమాచారం.

ఎన్నికల్లో ఒక పార్టీ గెలుపోటములను ప్రభావితం చేయడంలో పార్టీ గుర్తు ఎంతో కీలక పాత్ర పోషిస్తుంది. ఇలాంటి పరిస్థితుల్లో భాజపా ఎన్నికల చిహ్నం కమలం. ఈ గుర్తు సామాన్య ప్రజలందరికీ చిరపరిచితం. అభ్యర్థుల కన్నా, ఎన్నికల గుర్తు ఓటర్లను మరింత ప్రభావితం చేస్తోంది. దీనికి తోడు, భాజపాకు పోలింగ్ బూత్ స్థాయిలో కార్యకర్తలు ఉన్నారు.

ప్రజారాజ్యం పార్టీకి రాష్ట్ర వ్యాప్తంగా మంచి ఆదరణ ఉంది. ఈ రెండు కలిస్తే.. రాష్ట్రంలో అనూహ్య ఫలితాలు సాధించవచ్చన్నది ఇరు పార్టీల నేతల అభిప్రాయం. అందుకే, ప్రజారాజ్యం పార్టీకి ఎన్నికల గుర్తు లభించని పక్షంలో కమలంతో చెలిమి చేసి, ఆ గుర్తుపై పోటీ చేయాలని పీఆర్పీ నేతలు పలువురు భావిస్తున్నారు.

అదే సమయంలో ప్రజారాజ్యం పార్టీకి దేశ స్థాయిలో ఒక జాతీయ పార్టీ అండ లభించినట్టు అవుతుందని ఆ పార్టీ నేతల ఉద్దేశ్యంగా ఉంది. అయితే, కమలం గుర్తుపై పోటీ చేయడం వల్ల ఉత్పన్నమయ్యే నష్టాలను బేరీజు వేయడంలో చిరంజీవి నిమగ్నమై వున్నారు. ఎందుకంటే భాజపా మతత్వ పార్టీగా ముద్ర పడిన విషయం తెల్సిందే. అందువల్ల చిరంజీవి ఆచితూచి అడుగులు వేస్తున్నారు.

నాకు రాజకీయ లక్ష్యాలేమీ లేవు: ప్రియాంకా

2009-03-03T23:29:00.000-08:00

న్యూస్ ఇండియా బ్యూరో

అమేథీ, రాయ్‌బరేలీ నియోజకవర్గాల్లో మంగళవారం పర్యటించిన ప్రియాంకా గాంధీ ఈ సందర్భంగా పార్టీ కార్యకర్తలతో మమేకమయ్యారు. వారికి ఎన్నికల్లో విజయం సాధించేందుకు కొన్ని సలహాలు ఇచ్చారు. ఇదిలా ఉంటే క్రియాశీల రాజకీయాల్లోకి వచ్చే అవకాశాన్ని ప్రియాంకా గాంధీ ఈ సందర్భంగా తోసిపుచ్చారు.

తన సోదరుడు, తల్లి కోసం మాత్రమే పనిచేస్తున్నానని చెప్పారు. వారు వేరేచోట్ల ప్రచార కార్యక్రమాలతో తీరికలేకుండా గడుపుతున్న కారణంగా, వారి తరపున తాను ఇక్కడ పనిచేస్తున్నానని తెలిపారు. తనకు ప్రత్యేకంగా ఎటువంటి రాజకీయ లక్ష్యాలేమీ లేవని ప్రియాంకా గాంధీ స్పష్టం చేశారు.

పార్టీని బలపరిచేందుకు, సోదరుడు రాహుల్, తల్లి సోనియా గాంధీల తరపున ప్రచారం చేసేందుకు అమేథీ, రాయ్‌బరేలీ పర్యటనకు వచ్చానని మున్షిగంజ్ అతిథి గృహంలో ఆమె విలేకరులతో చెప్పారు.

ఎన్నికల్లో పోటీ చేయాలని వస్తున్న ప్రతిపాదనలను పరిశీలిస్తారా అని అడిగిన ప్రశ్నకు ప్రియాంకా గాంధీ వద్రా బదులిస్తూ.. ఇది చాలా పాత డిమాండ్ అన్నారు. ఎన్నికల్లో తాను పోటీ చేయబోనని స్పష్టం చేశారు. రాహుల్ గాంధీపై ప్రతిపక్ష బీజేపీ ప్రధానమంత్రి అభ్యర్థి ఎల్‌కే అద్వానీ చేసిన వ్యాఖ్యలపై స్పందించేందుకు ఆమె నిరాకరించారు. తాను రాజకీయాల్లో ఉన్న వ్యక్తిని కాదని, దీనిపై మాట్లాడబోనని చెప్పారు.

Get Ready for Action

2009-03-03T02:01:00.001-08:00

టీడీపీ కుటుంబస్థాయి పార్టీ: బీజేపీ

2009-03-03T00:43:00.001-08:00

న్యూస్ ఇండియా బ్యూరో

బీజేపీ ప్రాంతీయ పార్టీ స్థాయికి పడిపోయిందంటూ టీడీపీ అధినేత చంద్రబాబు చేసిన విమర్శపై ఆ పార్టీ తీవ్రస్థాయిలో విరుచుకుపడింది. తమది ప్రాంతీయ పార్టీ స్థాయి కాదని, టీడీపీనే కుటుంబస్థాయి పార్టీగా దిగజారిందని బీజేపీ విమర్శించింది.

ఈ విషయమై బీజేపీ జాతీయ కార్యదర్శి ఇంద్రసేనారెడ్డి మాట్లాడుతూ రాబోయే ఎన్నికల్లో ఓటమి భయంతో టీఆర్ఎస్, వామపక్షాలతో పొత్తు పెట్టుకున్న చంద్రబాబు తమను విమర్శించడం తగదని పేర్కొన్నారు. ఎన్నికల కోసం చంద్రబాబు ఇస్తున్న హామీలను ప్రజలు నమ్మే స్థితిలోలేరని ఈ సందర్భంగా ఆయన విమర్శించారు.

ఇటీవల చంద్రబాబు మాట్లాడుతూ బీజేపీ, కాంగ్రెస్ పార్టీలు ప్రస్తుతం ప్రాంతీయ పార్టీల స్థాయికి పడిపోయాయని వాటికి దేశం మొత్తంగా బలమేమీ లేదని పేర్కొన్నారు.

ప్రచారంలో మాత్రమే కాంగ్రెస్ అభివృద్ధి: బాబు

2009-03-03T00:39:00.000-08:00

న్యూస్ ఇండియా బ్యూరో

గత ఐదేళ్లుగా రాష్ట్రాన్ని పాలించిన కాంగ్రెస్ పార్టీ ప్రచారంలో మాత్రమే అభివృద్ధి కనిపిస్తోందని టీడీపీ అధినేత చంద్రబాబు విమర్శించారు. స్వప్రయోజనాలకోసం భూములను అన్యాక్రాంతం చేస్తూన్న వైఎస్ ప్రభుత్వం సాధించిన అభివృద్ధి ఇదేనా అంటూ ఆయన ప్రశ్నించారు.

ఈ విషయమై ఆయన ఓ టీవీ ఛానెల్‌తో మాట్లాడుతూ కాంగ్రెస్ పాలనపై విమర్శనాస్త్రాలు ఎక్కుపెట్టారు. తెల్ల రేషన్‌ కార్డులను ఇష్టానుసారం జారీ చేస్తున్న ప్రభుత్వం ఆ కార్డులకు బియ్యాన్ని మాత్రం పంపిణీ చేయడంలేదంటూ పేర్కొన్నారు. అలాగే రిజర్వేషన్ల శాతాన్ని పునర్‌వ్యవస్థీకరించకుండానే ప్రభుత్వం కొన్ని బీసీ కులాలను డి నుంచి ఏకు మార్చిందంటూ ఆయన విమర్శించారు.

తన పాలనలో రాష్ట్రం వెలిగిపోతోందంటూ చెబుతున్న వైఎస్ బియ్యం ధరలు ఎందుకు కొండెక్కాయో చెప్పాలంటూ ప్రశ్నించారు. టీడీపీ తరపున ప్రచారం చేస్తున్న బాలకృష్ణపై నాన్‌బెయిలబుల్ కేసు పెట్టడం కూడా ప్రభుత్వం కక్ష సాధింపు చర్యగానే ఆయన పేర్కొన్నారు. అలాగే ఆయన మాట్లాడుతూ రానున్న ఎన్నికల సందర్భంగా తమ ఎన్నికల ప్రణాళికలో ఓ విన్నూత్న పథకాన్ని చేర్చనున్నట్టు ఆయన పేర్కొన్నారు.

మహాకూటమిలో "ఎజెండా" ముసలం!

2009-03-03T00:32:00.000-08:00

ఎం ఎచ్ అహెసన్ / హైదరాబాద్

మహాకూటమికి ఎజెండా ముసలం పట్టుకుంది. తెలంగాణపై రోజుకోరకంగా మాట్లాడి కయ్యానికి కాలు దువ్వుతున్న వామపక్షాల వైఖరి పట్ల తెరాస అధినేత కేసీఆర్ గుర్రుగా ఉన్నారు. వామపక్షాల నేతల వ్యాఖ్యల పట్ల తెదేపా అధినేత చంద్రబాబు సైతం వినీవిన్నట్టు ఉండటాన్ని కూడా ఆయన సహించలేక పోతున్నారు. దీంతో మహాకూటమి నేతల్లో ఎజెండా విషయంలో మనస్పర్ధలు తలెత్తినట్టు సమాచారం.

మహాకూటమిలో తెలంగాణా అంశానికి ఎలాంటి ప్రాధాన్యత లేదని, కూటమి తరపున ఉమ్మడి ఎజెండా లేదని, ఇలా భిన్న ప్రకటనుల చేస్తూ ప్రజల్లో గందరగోళం సృష్టిస్తున్నాయి. వీటిపై తెరాస నేతలు ఆందోళన చెందుతున్నారు. జనాల్లో వామపక్షాలు సృష్టిస్తున్న గందరగోళానికి కూటమికి నాయకత్వం వహిస్తున్న చంద్రబాబు ఎలాంటి ప్రయత్నాలూ చేయకపోవడం తెరాస శ్రేణులను తీవ్ర ఆగ్రహానికి గురి చేస్తోంది.

వామపక్షాలకు సీనియర్ నేతలు రాఘవులు, నారాయణలు చేస్తున్న ప్రకటనలపై చంద్రబాబు ఆదిలోనే జోక్యం చేసుకుని ఉంటే ఈ గందరగోళ పరిస్థితులు నెలకొని ఉండేవి కాదని తెరాస శ్రేణులు అభిప్రాయపడుతున్నాయి. ఆరంభంలో తమ దారికిరాని సీపీఐను సైతం తమ వైపునకు తిప్పుకున్న సీపీఐలాంటి పార్టీ నేతల నేతల నోటికి చంద్రబాబు తలచుకుంటే తాళం వేయించగలరని తెరాసకు చెందిన పలువురు సీనియర్ నేతలు అభిప్రాయపడుతున్నారు.

దీనికి తోడు చంద్రబాబు మౌనం వహించడంతో వామపక్షాలకు మరింత ఊతం ఇచ్చినట్టు అవుతున్నదని ఆ పార్టీ నేతలు పేర్కొంటున్నారు. అంతేకాకుండా, సమైక్య ఆంధ్రకు కట్టుబడి ఉన్నామని చెపుతున్న వామపక్షాలతో కలిసి ఒకే వేదికను ఎలా పంచుకోగలమని వారు ప్రశ్నిస్తున్నారు.

అందువల్ల తెలంగాణాపై నేతలు చేస్తున్న భిన్న ప్రకటనలను ఇప్పటికైనా ఆపించాలని తెరాస నేతలు డిమాండ్ చేస్తున్నారు. అయితే, వామపక్ష నేతల ప్రకటనలపై తెరాస అధినేత కేసీఆర్ ఎలాంటి వ్యాఖ్యలు చేయకపోవడం గమనార్హం.

ఎస్సీ వర్గీకరణ జరిగి తీరుతుంది: కోనేరు

2009-03-03T00:23:00.001-08:00

న్యూస్ ఇండియా బ్యూరో

ఎస్సీల వర్గీకరణ జరిగి తీరుతుందని, దీన్ని ఎవరూ ఆపలేరని మంత్రి కోనేరు రంగారావు పేర్కొన్నారు. ఎస్సీల వర్గీకరణ కోసం తాము చేయాల్సిందంతా చేశామని, అయితే జాప్యం జరిగిందని ఈ సందర్భంగా ఆయన వ్యాఖ్యానించారు.

ఈ విషయమై సోమవారం ముఖ్యమంత్రిని కలిసిన తర్వాత ఎంపీ నంది ఎల్లయ్య, మాజీ ఎంపీ మంద జగన్నాథం, ఎమ్మెల్యేలు మాణిక్య వరప్రసాద్, గంగారాంలతో కలిసి ఆయన విలేకరుల సమావేశంలో పాల్గొన్నారు. ఈ సందర్భంగా ఆయన మాట్లాడుతూ వర్గీకరణపై కేంద్రంలో వివిధ స్థాయిల్లో భిన్నాభిప్రాయాలు ఉన్న కారణంగానే ఇబ్బందులు వచ్చాయని పేర్కొన్నారు.

అలాగే సాంకేతిక కారణలవల్లే గత పార్లమెంటు సమావేశాల్లో వర్గీకరణ బిల్లు ప్రవేశపెట్టడం వీలుకాలేదని ఆయన అన్నారు. వర్గీకరణ అంశంలో ముఖ్యమంత్రి వైఎస్ చిత్తశుద్ధిని శంకించాల్సిన పనిలేదని ఈ విషయంలో ఆయన చేయాల్సిందంతా చేశారని కోనేరు పేర్కొన్నారు.

మహాకూటమిలో కొలిక్కి వచ్చిన సీట్ల పంపిణీ!

2009-03-03T00:19:00.000-08:00

ఎం ఎచ్ అహెసన్ / హైదరాబాద్

ఎన్నికల సమయం దగ్గరపడుతుండటంతో మహాకూటమిలో సీట్ల పంపిణీపై చర్చలు ప్రారంభమయ్యాయి. తెలుగుదేశం, తెలంగాణా రాష్ట్ర సమితి, సీపీఐ, సీపీఎం పార్టీలకు చెదిన సీనియర్ నేతలు ఈ చర్చల్లో పాలు పంచుకుంటున్నారు. కాగా, వచ్చే ఎన్నికల్లో తెరాస, వామపక్షాలకు కేటాయించగా మిగిలిన 215 అసెంబ్లీ, 29 లోక్‌సభ స్థానాలకు పోటీ చేయాలని తెదేపా నిర్ణయించింది. సిపిఐ, సిపిఎం పార్టీలు 18 అసెంబ్లీ, రెండేసి లోక్‌సభ సీట్ల చొప్పున కేటాయించాలని భావించినట్టు తెలుస్తోంది.

ఈమేరకు ఇటీవల మహాకూటమి నేతల ఢిల్లీ పర్యటనలో ఖరారైనట్టు సమాచారం. అలాగే తెరాస మాత్రం 48 అసెంబ్లీ, తొమ్మిది లోక్‌సభ సీట్లలో భర్తీ పోటీ చేయనుంది. ఇదిలావుండగా నల్గొండ, భువనగిరి, మహబూబాబాద్, ఖమ్మం, అరకు నియోజకవర్గాల్లో ఏ నాలుగింటిలోనైనా రెండు వామపక్షాలు ఎంచుకోవచ్చని చంద్రబాబు చెప్పినట్లు తెలిసింది.

నల్గొండ తమకు వద్దని ఆ పార్టీలు చెప్పినట్టు సమాచారం. అయితే సీట్ల కేటాయింపులో ఒక అవగాహనకు వచ్చినప్పటికీ, స్థానాల కేటాయింపులో మాత్రం నాలుగు పార్టీల మధ్య ఏకాభిప్రాయం కుదరడం లేదన్నది ఆ కూటమి వర్గాల సమాచారం.

ఎస్సీ వర్గీకరణకు ప్రజారాజ్యం సమ్మతం

2009-03-02T23:08:00.000-08:00

ఎం ఎచ్ అహెసన్ / హైదరాబాద్

ప్రజారాజ్యం అధికారంలోకి వస్తే ఎస్సీ వర్గీకరణకు సానుకూలంగా స్పందిస్తుందని ప్రజారాజ్యం పార్టీ అధినేత చిరంజీవి అభిప్రాయపడ్డారు. ఆయన సోమవారం ఎచ్ ఎన్ ఎన్ తో మాట్లాడుతూ.. ఎస్సీ రిజర్వేషన్ వర్గీకరణకు తాము సానుకూలమని తిరుపతి సభలోనే స్పష్టంగా ప్రకటించామని ఆయన గుర్తు చేశారు. సామాజిక న్యాయంలో భాగంగానే ఎస్సీ వర్గీకరణ శాస్త్రీయంగా ఉండాలని ఆయన సూచించారు. ప్రజారాజ్యం పార్టీ అధికారంలోకి వస్తే వర్గీకరణపై మరోసారి తీర్మానం చేస్తామని ఆయన స్పష్టం చేశారు.

ఎస్సీ వర్గీకరణ అంశం ఇంత పెద్ద ఎత్తున వివాదాస్పదం కావడానికి కాంగ్రెస్ పార్టీ మోసపూరిత వైఖరే ప్రధాన కారణమన్నారు. ఎస్సీ వర్గీకరణ కోసం మాదిగ దండోరా నాయకులు, కార్యకర్తలు చేస్తున్న ఉద్యమం తీవ్ర రూపం దాల్చడం, విధ్వంసాలకు, ఉద్రిక్తతలకు దారితీయడం, పలువురు గాయపడడం, దాడుల సందర్భంగా కొందరు ప్రాణాలు కోల్పోవడం దురదృష్టకరమైన సంఘటనగా ఆయన వ్యాఖ్యానించారు.

ఈనెల పదో తేదీలోగా ప్రజారాజ్యం పార్టీ అభ్యర్థుల తొలి జాబితా ప్రకటిస్తామని చిరంజీవి మరో ప్రశ్నకు జవాబిచ్చారు. తమ పార్టీ నుంచి పోటీ చేసేందుకు రాష్ట్ర వ్యాప్తంగా మహిళల నుంచి విపరీతమైన స్పందన వస్తున్నదని ఆయన చెప్పారు. కేంద్రంలో నాలుగో కూటమి ఏర్పాటు కోసం తాము ప్రయత్నిస్తామని చిరంజీవి వెల్లడించారు. అయితే, ఇప్పటికీ ఉన్న మహాకూటమిలో చేరాల్సిందిగా సిపిఎం రాష్ట్ర కార్యదర్శి బి.వి. రాఘవులు చేసిన విజ్ఞప్తిని చిరంజీవి తిరస్కరించారు.